“`html
Policia investon 2.4 milionë euro për një qendër biometrike që do të lidhë fytyrën, gjurmët dhe dokumentet.
Policia e Shtetit do të pajiset me një qendër të re për identifikimin biometrik, e cila synon të unifikojë në një sistem të vetëm gjurmët e gishtave, njohjen e fytyrës, fotografitë, tatuazhet, zërin dhe kontrollin e dokumenteve të identitetit.
Operatori i Blerjeve të Përqendruara ka shpallur një tender me fond limit prej 223.6 milionë lekësh pa TVSH, pothuajse 2.39 milionë euro, për ngritjen e Qendrës me Sistemet Multiaplikative të Identifikimit Biometrik të Personit (AMAIS), pranë Qendrës së Furnizimit Materialo-Teknik në Mullet.
Ky projekt parashikon:
- Furnizimin me 12 sisteme shumëfunksionale për mbledhjen dhe administrimin e të dhënave biometrike të personave të ndaluar ose të arrestuar.
- Furnizimin me 30 pajisje portative për identifikim përmes gjurmëve të gishtave dhe imazhit të fytyrës.
Sistemet fikse do të instalohen në strukturat e Policisë së Shtetit ku kryhen procedurat për personat e ndaluar dhe të arrestuar. Ato do të përdoren për të krijuar dosje biometrike duke përfshirë të dhëna personale, numrin e regjistrimit penal, gjurmët e të gjitha gishtave dhe pëllëmbëve, fotografi ballore dhe profili, imazhe të tatuazheve dhe shenjave të veçanta, si dhe kampionë zëri.
Pajisjet duhet të kenë aftësinë të marrin automatikisht fotografi, të kontrollojnë cilësinë e imazhit, të rregullojnë pozicionin e personit dhe të transmetojnë të dhënat drejt bazave qendrore të Policisë së Shtetit. Sistemet do të integrohen me AFIS/APIS për gjurmët e gishtave dhe me AFAIS për identifikimin përmes fytyrës.
Dokumentacioni i tenderit specifikon se gjurmët e personave të ndaluar ose arrestuar do të krahasohen automatikisht me të dhënat e administruara si prova shkencore në çështje penale nën hetim ose të pezulluara. Gjithashtu, gjurmët e gjetura në vendngjarje do të dërgohen në kohë reale në sistemin AFIS/APIS për krahasim me bazën e të dhënave.
Tridhjetë pajisjet portative do t’u mundësojnë strukturave policore të verifikojnë në terren identitetin e personave duke përdorur gjurmët e gishtave dhe fytyrën. Rezultatet e kërkimit do të shfaqen në terminal, së bashku me të dhënat e regjistruara për individin në sistemet qendrore.
Këto pajisje do të përdoren gjithashtu për kontrollin e kartave të identitetit, pasaportave biometrike, vizave dhe dokumenteve të udhëtimit. Ato duhet të jenë në gjendje të lexojnë çipin RFID dhe kodin MRZ, të krahasojnë fotografinë dhe gjurmët e ruajtura në dokument me personin që e paraqet, dhe të analizojnë elementet e sigurisë përmes dritës së bardhë, ultravjollcë, infra të kuqe dhe ndriçimit këndor.
Platforma elektronike do të përfshijë pajisjet, programet dhe shërbimet e nevojshme për lidhjen e terminaleve portative me bazat qendrore. Dokumentacioni kërkon gjithashtu një bazë të dhënash me modele dokumentesh dhe kartëmonedhash, me elemente sigurie nga të paktën 100 vende.
“`