“`html
A po përgatit Rama ndryshime në qeveri? Çfarë pritet të ndodhë nesër te socialistët, zbulohet mesazhi i Ballës: Deri në 27 Korrik mos bëni plane…
Publikuar më 23.07.2026 nga shekulli_admin
TIRANË – Kryeministri Edi Rama u shfaq sot në sallën e Kuvendit, pas një mungese të gjatë, në seancën e fundit për këtë sesion parlamentar. Ai u paraqit me një portret të heshtur dhe pothuajse të përhumbur.
Ndërkohë që prej dy muajsh protestohet çdo ditë pranë zyrës së tij, Rama u kujdes që të mbërrinte në Kuvend në një orar kur numri i protestuesve përpara sallës së seancave plenare ishte i pakët, ndërkohë që masat e sigurisë ishin shumë të larta.
Pavarësisht tensioneve të jashtme dhe një opozite që gjatë gjithë këtij sesioni ka pasur më së shumti rolin e zhurmuesit, seanca e sotme u mbyll pa diskutime thelbësore në Kuvend, edhe pse zgjati pothuajse 7 orë. Socialistët votuan me shumicë projektligje të rëndësishme, përfshirë ato për ndryshimet në krye të Komisionit për Prokurimet Publike, si dhe raportet e institucioneve të drejtësisë.
Megjithatë, nëse për deputetët e Partisë Demokratike pushimet nisin që sot pasdite, nuk mund të thuhet e njëjta gjë për socialistët. Një pjesë e mirë e tyre do të jetë në ankth për mbledhjen e zgjeruar që Rama ka thirrur me ministrat dhe grupin parlamentar.
Nën zë flitet se Rama mund të bëjë ndryshime në qeveri, duke qenë i pakënaqur me punën e disa ministrave, por edhe si një përpjekje për të amortizuar revoltën kundër tij. Pak ditë më parë, kreu i grupit parlamentar, Taulant Balla, u ka dërguar një mesazh socialistëve lidhur me mbledhjen e ditës së nesërme, duke u kërkuar që të mos bëjnë plane për pushime, të paktën deri në datën 27 Korrik.
Në radhët e vetë socialistëve nuk kanë munguar klanet, me Elisa Spiropalin, e cila ka paraqitur zyrtarisht pranë organeve të Partisë, “Marrëveshja e Re për Shqipërinë”, një analizë kritike mbi mënyrën e funksionimit të shumicës qeverisëse. Edhe sot në Kuvend, Spiropali u shigjetoi kundërshtarët e saj brenda dhe jashtë partisë, duke i cilësuar “BEDELA”, që nuk do të arrinin ta intimidonin atë dhe familjen e saj. Ky deklarim vjen në referencë të kontrolleve që janë kryer në disa biznese të saj dhe familjes, për të cilat edhe bashkëshorti i saj u mor në pyetje në Policinë e Tiranës, si i dyshuar për kanosje ndaj një drejtoreshe të Tatimeve.
Për emrat që mund të largohen nga qeveria është ende herët të flitet, pasi një pjesë e mirë e ministrave mësojnë emërimin e tyre vetëm kur kryeministri Rama e komunikon publikisht vendimin.
A do të jetë e njëjta skenë edhe nesër? Me gjasë po!
Gjatë një qeverisjeje që vijon në mandatin e saj të katërt, Rama ka bërë shpesh ndryshime në qeveri, të cilat shpesh kanë shërbyer më shumë për imazh sesa për performancë.
A do të diktojë vala e protestës një qasje tjetër të socialistëve në qeverisje? Kjo është pyetja, ku vetëm Edi Rama mund të japë përgjigje!
/SHEKULLI
“`