Transporti Ajror Vijon Ngjitjen, Pasagjerët Rriten me 26,4% në Tremujorin e Dytë
Transporti ajror i pasagjerëve në vend shënoi një rritje dyshifrore në tremujorin e dytë të vitit 2026, ndërkohë që volumi i mallrave dhe postës u ul. Të dhënat e INSTAT tregojnë se gjatë periudhës prill-qershor udhëtuan me linja ajrore 3.858.055 pasagjerë, krahasuar me 3.052.511 në të njëjtën periudhë të vitit të kaluar. Kjo përfaqëson një rritje vjetore prej 26,4%.
Në transportin ajror operuan 33 shoqëri ajrore të huaja, ndërsa në vitin paraprak kishin qenë 29. Numri i fluturimeve arriti në 23.216, duke u rritur nga 18.458 një vit më parë. Në total, në hapësirën ajrore shqiptare fluturuan 121.684 avionë. Prej tyre, 98.468 ishin mbikalime, që përbëjnë 80,9% të totalit, ndërsa pjesa tjetër përfshinte fluturimet e raportuara në vend.
Rritja e numrit të pasagjerëve nga Aeroporti Ndërkombëtar i Tiranës, i vetmi aeroport në vend, vijon prej kohësh një trajektore në ngjitje. Kjo situatë lidhet me shtimin e numrit të destinacioneve të mbuluara nga linjat low-cost, si dhe me ecurinë e mirë të turizmit në Shqipëri, e cila ka vijuar të jetë në qendër të promovimit ndërkombëtar.
Nga ana tjetër, transporti ajror i mallrave dhe postës u tkurr. Volumi i hyrjeve dhe daljeve arriti në 704 tonë, duke shënuar një rënie prej 11,9% krahasuar me tremujorin e dytë të vitit 2025. Mallrat dhe posta e hyrë përbënin 74,6% të volumit të përgjithshëm, ndërsa mallrat dhe posta e dalë zinin 25,4%.
Edhe tregtia e mallrave me ajër shënoi rënie. Volumi i importeve dhe eksporteve arriti në 556 tonë, ose 4,7% më pak se në të njëjtën periudhë të vitit të kaluar. Sipas INSTAT, mallrat e importuara me ajër përbënin vetëm 0,02% të volumit të përgjithshëm të mallrave të importuara në vend.