Lamallari mbledh prefektët: Institucionet të jenë në terren, jo vetëm në zyrë
Ministria e Punëve të Brendshme ka vënë theksin te forcimi i masave për sigurinë publike dhe menaxhimin e situatave të mundshme gjatë muajve të verës. Për këtë qëllim, ministri Besfort Lamallari zhvilloi një takim me prefektët e 12 qarqeve të vendit.
Gjatë diskutimeve u vlerësua nevoja për një bashkëpunim më të ngushtë mes institucioneve, veçanërisht në kushtet e sezonit turistik dhe rrezikut të shtuar nga zjarret. Ministri kërkoi që strukturat përgjegjëse të jenë më të pranishme në terren dhe të garantojnë reagim sa më të shpejtë ndaj problematikave që mund të shfaqen.
Në fokus të takimit ishin edhe Këshillat Vendorë të Sigurisë Publike. Lamallari kërkoi që këto struktura të kenë një rol më aktiv dhe të shërbejnë si mekanizma funksionalë për koordinimin e institucioneve në nivel vendor.
Sipas ministrit, puna e institucioneve duhet të bazohet në bashkëpunim të vazhdueshëm dhe ndërhyrje konkrete, duke shmangur qasjen rutinë dhe duke synuar ofrimin e një shërbimi më efikas dhe më të sigurt për qytetarët.