Eurostat: 53% e familjeve shqiptare nuk përballojnë dot një javë pushime, vendi i dytë në Europë
Shqipëria, pavarësisht se është e pasur me peizazhe të bukura natyrore si dete, liqene dhe male, përballet me një realitet ekonomik sfidues. Mbi gjysma e familjeve shqiptare nuk kanë mundësi financiare të përballojnë një javë pushime në vit larg banesës së tyre. Ky tregues e rendit Shqipërinë ndër vendet me nivelin më të lartë të privimit ekonomik në Europë.
Sipas të dhënave të Eurostat, për vitin 2025 për Europën dhe për vitin 2023 për Shqipërinë, rreth 53% e familjeve shqiptare nuk mund të përballojnë financiarisht një javë pushime. Shqipëria pozicionohet e dyta në kontinent pas Rumanisë, ku kjo përqindje tejkalon 60%.
Pas Shqipërisë, renditen Turqia me rreth 51%, Maqedonia e Veriut me afërsisht 48% dhe Greqia me rreth 47%. Këto shifra tregojnë se pamundësia për të bërë pushime është më e përhapur në vendet e Europës Juglindore dhe në ekonomitë me të ardhura më të ulëta.
Krahasuar me rajonin, Shqipëria shënon një performancë më të dobët. Në Serbi, rreth 36% e familjeve nuk mund të përballojnë pushimet, ndërsa në Bullgari dhe Hungari, përqindja arrin rreth 39%. Italia regjistron një nivel prej rreth 36%, ndërsa Portugalia, Kroacia dhe Spanja luhaten mes 32-33%.
Mesatarja e Bashkimit Europian për këtë tregues është rreth 27%, pothuajse gjysma e nivelit të regjistruar në Shqipëri. Kjo nënkupton se pamundësia për të bërë një javë pushime prek proporcionalisht gati dy herë më shumë familje shqiptare sesa mesatarja e familjeve në BE.
Në vendet me të ardhura më të larta, përqindja është ndjeshëm më e ulët. Në Gjermani dhe Irlandë, rreth një në pesë familje nuk mund të përballojë pushimet. Në Holandë dhe Suedi, niveli zbret në rreth 12-13%. Përqindjet më të ulëta regjistrohen në Zvicër dhe Norvegji, ku më pak se 10% e familjeve nuk kanë mundësi të kryejnë një javë pushime, si dhe në Luksemburg me rreth 11%.
Pozicioni i Shqipërisë pasqyron nivelin e ulët të të ardhurave të familjeve dhe hapësirën e kufizuar për shpenzime jo thelbësore, për shkak të kostove të larta për ushqim, strehim, energji dhe transport. Megjithëse pushimet nuk konsiderohen një shpenzim bazë, pamundësia për t’i financuar përdoret si një tregues i rëndësishëm i standardit të jetesës dhe i privimit material.
Është e rëndësishme të theksohet se treguesi i Eurostat nuk mat nëse një person ka udhëtuar realisht me pushime, por nëse familja ka mundësinë financiare për të paguar një javë larg shtëpisë. Pushimet mund të realizohen si brenda, ashtu edhe jashtë vendit. Nëse një familje zgjedh të mos udhëtojë për arsye personale, ajo nuk konsiderohet automatikisht si e privuar.