A ka mbërritur e ardhmja?
Artisti gjerman krijon bluzën që fsheh njeriun nga kamerat me inteligjencë artificiale
Një artist gjerman ka prezantuar një projekt të pazakontë që sfidon mënyrën se si sistemet e inteligjencës artificiale (AI) identifikojnë njerëzit përmes kamerave.
Simon Weckert ka krijuar “Digital Camouflage”, një bluzë shumëngjyrëshe, në stilin havai, me një model të dizenjuar posaçërisht për të penguar sistemet e shikimit kompjuterik.
Për syrin e njeriut, bluza duket thjesht si një veshje me ngjyra të forta. Megjithatë, modelet e AI, të përdorura për njohjen e objekteve dhe njerëzve, analizojnë elemente të ndryshme vizuale, duke përfshirë konturet e kokës dhe shpatullave, përmasat e trupit dhe siluetën.
Sipas projektit, modeli i aplikuar në bluzë ka për qëllim të prishë këto sinjale vizuale. Në disa teste, sistemet e njohjes nuk kanë mundur të identifikojnë personin që e mbante veshur si njeri.
Weckert nuk pretendon se bluza e bën njeriun “të padukshëm” për kamerat. Projekti synon kryesisht të ilustrojë dobësitë dhe kufizimet e teknologjive të mbikëqyrjes të bazuara në inteligjencën artificiale.