Deputeti socialist Erion Braçe ka ngritur shqetësime të forta lidhur me çmimet e larta të shërbimeve në aeroportin “Nënë Tereza”. Ai publikoi një video në rrjetet sociale duke treguar faturën për një kapuçino të blerë në një nga kafenetë e aeroportit, e cila i kushtoi 550 lekë.
Braçe e konsideroi këtë çmim tepër të lartë, si për qytetarët shqiptarë, ashtu edhe për turistët që vizitojnë Shqipërinë. Ai theksoi se pavarësisht mburrjes me numrin e madh të udhëtarëve, çmime të tilla nuk janë arsye për krenari. Sipas tij, edhe pse aeroporti po përmirësohet me investime të mëdha dhe po bëhet më i madh, duhet të ketë më shumë rregull dhe disiplinë.
Ai shtoi se pavarësisht investimeve marramendëse, duket se mungon rregulli dhe organizimi jashtë ambienteve të brendshme, duke e përshkruar situatën me fjalët: “Atje qelbet erë”.