Ligji i faljes së detyrimeve tatimore: 651 tatimpagues përfituan në gusht, fshihen 1.95 milionë euro
Gjatë muajit gusht, 651 tatimpagues përfituan nga falja automatike e detyrimeve tatimore të papaguara, duke rezultuar në fshirjen ose shuarjen e një vlere totale prej 1.95 milionë eurosh.
Drejtoria e Përgjithshme e Tatimeve ka njoftuar se procesi po vijon në zbatim të ligjit nr. 86/2025, i cili synon fshirjen, shuarjen dhe mundësimin e pagesës së detyrimeve tatimore të papaguara.
Sipas Drejtorisë së Tatimeve, subjektet që plotësojnë kushtet e përcaktuara në ligj mund të vazhdojnë të përfitojnë nga këto lehtësira, duke përmbushur detyrimet përkatëse brenda dhjetorit 2026.
Zbatimi i këtij ligji ka filluar në qershor të këtij viti. Deri në fund të korrikut, ishin fshirë ose shuar rreth 313 milionë euro detyrime për 121,630 tatimpagues, ndërsa procesi vazhdonte për kategoritë e tjera përfituese.
Detyrimet e falura sipas periudhave kohore:
- Deri më 31 dhjetor 2014: Ligji parashikon fshirjen e plotë dhe pa kusht të detyrimeve tatimore për këtë periudhë. Fshirja bëhet automatikisht dhe nuk kërkon veprime apo pagesa shtesë nga tatimpaguesit. Vetëm në qershor, nga kjo kategori ishin falur 215 milionë euro për 25,005 tatimpagues.
- Periudha 2015-2019: Ligji ofron dy mundësi:
- Afati për të paguar 50% të principalit dhe për të përfituar fshirjen e 50% tjetër, së bashku me gjobat dhe kamatëvonesat, ka përfunduar më 30 qershor.
- Subjektet kanë ende mundësi të paguajnë 75% të principalit deri më 31 dhjetor 2026, duke përfituar fshirjen e 25% të mbetur dhe të plotë të gjobave e kamatëvonesave.
- Periudha 2020-2024: Për detyrimet e krijuara në këtë periudhë, tatimpaguesit duhet të paguajnë të gjithë principalin deri më 31 dhjetor 2026. Gjobat dhe kamatëvonesat për këtë periudhë fshihen plotësisht.
Në kuadër të zbatimit të ligjit, Administrata Tatimore ka kryer gjithashtu kompensimin automatik të tepricave kreditore me detyrimet e papaguara. Vetëm në muajin qershor, vlera e këtyre kompensimeve arriti në 10.4 milionë euro, duke përfituar 13,408 tatimpagues dhe duke përfshirë 86,773 transaksione.