Kryeministri izraelit, Benjamin Netanyahu, ka paralajmëruar organizatën Hezbollah se do të vazhdojë shkatërrimin e infrastrukturës në jug të Libanit dhe se do të ketë pasoja edhe më të rënda në rast të një sulmi të ri.
Netanyahu deklaroi se ushtria izraelite do të vijojë goditjen e objektivave të Hezbollahut në atë që Izraeli e cilëson si “zonë sigurie” në jug të Libanit. Në një deklaratë me video, ai i përshkroi operacionet e fundit si “një tjetër fitore të madhe ndaj Hezbollahut”, duke pretenduar se janë shkatërruar pozicione të rëndësishme të organizatës në lartësitë Beaufort dhe Ali Taher.
Ai shtoi se Izraeli do të vijojë të eliminojë çdo kërcënim që, sipas tij, mund të rrezikojë vendin, duke sinjalizuar vazhdimin e pranisë dhe operacioneve ushtarake izraelite në këtë pjesë të Libanit.
Deklaratat vijnë pas shkatërrimit të objekteve të gjera nëntokësore të Hezbollahut në zonën e Ali Taherit, të cilën Izraeli e konsideron me rëndësi strategjike për aktivitetin ushtarak të organizatës në jug të Libanit.
Në përfundim të deklaratës, Netanyahu dha një paralajmërim të drejtpërdrejtë për kundërshtarët e Izraelit, duke thënë se çdo përpjekje e re për të sulmuar vendin do të pasohet nga një përgjigje më e ashpër.
“Nëse ende nuk e keni mësuar mësimin tuaj dhe vendosni të na sulmoni përsëri, do të merrni goditje edhe më të rënda”, tha ai. “Ka ende punë për t’u bërë dhe, me vullnetin e Zotit, ne do ta përfundojmë atë”, përfundoi kryeministri izraelit.
Deklaratat e Netanyahut tregojnë se Izraeli synon të ruajë presionin ushtarak ndaj Hezbollahut dhe të vijojë operacionet në Libanin jugor, në një kohë kur tensionet në rajon mbeten të larta.