Aksidentet rrugore shënojnë rritje 10% në janar-korrik, shkaku kryesor pakujdesia e drejtuesve të mjeteve
Numri i aksidenteve rrugore në Shqipëri është rritur me 10% gjatë shtatë muajve të parë të vitit 2026, krahasuar me të njëjtën periudhë të vitit paraprak. Edhe muaji korrik ka shënuar një numër më të lartë rastesh krahasuar me një vit më parë, sipas të dhënave të publikuara nga Instituti i Statistikave (INSTAT).
Në muajin korrik, janë regjistruar 165 aksidente rrugore, krahasuar me 131 raste në korrikun e vitit 2025. Numri i personave të vrarë dhe të plagosur gjatë këtij muaji arriti në 235, ndërsa një vit më parë ky numër ishte 194.
Për periudhën janar-korrik, numri total i aksidenteve arriti në 844, nga 767 të regjistruara në të njëjtën periudhë të vitit të kaluar. Viktimat, përfshirë të vdekurit dhe të plagosurit, shkuan në 1,187 persona, kundrejt 1,077 në shtatëmujorin e vitit 2025.
INSTAT ka theksuar se 90.3% e aksidenteve të ndodhura në korrikun e vitit 2026 janë rezultat i sjelljes së drejtuesve të mjeteve.
Sipas analizave, grupmosha 25-34 vjeç ka qenë më e prekur, duke përbërë 21.8% të numrit total të aksidenteve të regjistruara.
Qarku i Tiranës ka shënuar numrin më të lartë të aksidenteve në muajin korrik, me 59 raste, ndërsa një vit më parë ishin 37. Kryeqyteti regjistroi gjithashtu 74 persona të vrarë ose të plagosur gjatë këtij muaji. Në shtatë muajt e parë të vitit, Tirana numëroi 336 aksidente, krahasuar me 219 në të njëjtën periudhë të vitit 2025.
Duke analizuar fashat orare, INSTAT ka raportuar se pjesa më e madhe e aksidenteve janë regjistruar mes orës 19:00 dhe 24:00, duke zënë 25.5% të totalit. Brenda javës, e enjtja rezultoi dita me përqindjen më të lartë të aksidenteve, me 18.8%, ndërsa e martë shënoi nivelin më të ulët, me 12.1%.
Të dhënat për aksidentet sigurohen nga Drejtoria e Përgjithshme e Policisë së Shtetit dhe përpunohen nga INSTAT. Vlen të theksohet se shifrat për muajin e fundit të raportuar janë paraprake dhe mund t’i nënshtrohen rishikimit.
Rritja e numrit të aksidenteve vjen në një periudhë kur janë ndërmarrë disa masa dhe reagime për të rritur kujdesin në drejtimin e automjeteve, përfshirë ndryshime në Kodin Rrugor dhe kontrolle të shtuara në terren. Përveç sjelljes së drejtuesve të mjeteve, si faktorë që kontribuojnë në aksidente përmenden shpesh edhe gjendja e infrastrukturës rrugore dhe zonat e identifikuara si “pika të zeza”. Megjithëse në disa prej këtyre zonave janë kryer ndërhyrje, ato vazhdojnë të mbeten problematikë në lidhje me sigurinë rrugore.