“`html
Aksidentet rrugore shënojnë rritje 6.8% në gjysmën e parë të vitit; kryeson Tirana
Numri i aksidenteve rrugore në vend është rritur në qershor, ndërsa në totalin e gjysmës së parë të vitit, kjo shifër është zgjeruar me 6.8% krahasuar me të njëjtën periudhë të vitit të kaluar.
Të dhënat paraprake të INSTAT tregojnë një rritje të konsiderueshme të aksidenteve gjatë muajit qershor, periudhë kur edhe pasojat në formë plagosjeje dhe humbje jete kanë qenë më të larta.
Gjatë muajit qershor, janë regjistruar 132 aksidente, ku si pasojë humbën jetën ose u plagosën 186 persona. Këto shifra krahasohen me 107 aksidente dhe 140 persona të aksidentuar në të njëjtin muaj të vitit 2025.
Në periudhën janar-qershor 2026, janë regjistruar gjithsej 679 aksidente rrugore, ndërsa një vit më parë numri ishte 636. Numri i personave të vrarë dhe të plagosur arriti në 952, ndërsa në gjashtëmujorin e parë të vitit 2025 shifra ishte 883.
Sipas INSTAT, 93.9% e aksidenteve të regjistruara në qershor kanë ndodhur si pasojë e sjelljes së drejtuesve të mjeteve. Grupmosha 35–44 vjeç përbënte peshën më të madhe të drejtuesve të përfshirë në aksidente, duke zënë 28% të totalit.
Qarku i Tiranës regjistroi numrin më të lartë të aksidenteve në vend gjatë gjashtëmujorit, me 277 raste dhe 345 persona të vrarë ose të plagosur. Pas saj renditen Lezha me 74 aksidente dhe Vlora me 67.
Një në katër aksidente ka ndodhur në intervalin orar 19:00–24:00, ndërsa dita me numrin më të lartë të rasteve ka qenë e marta, duke përbërë 18.9% të totalit. E enjtja regjistroi incidencën më të ulët, me 7.6%.
INSTAT thekson se këto të dhëna janë paraprake dhe mund t’i nënshtrohen përditësimi.
“`