Arrestohet shtetase gjermane me bombë në çantë pranë një ndërtese policie në Rusi
Shërbimi Federal i Sigurisë (FSB) i Rusisë ka njoftuar sot arrestimin e një shtetaseje gjermane 57-vjeçare, e cila dyshohet se mbante në çantë një pajisje shpërthyese me fuqi të barabartë me rreth 1.5 kg TNT. Autoritetet ruse bëjnë me dije se gruaja kishte si objektiv një ndërtesë policie në rajonin e Stavropol dhe se veprimi i saj dyshohet të ishte pjesë e një operacioni të organizuar nga shërbime të inteligjencës ukrainase.
Pamjet filmike të shpërndara në rrjetet sociale tregojnë momentin e ndalimit të saj në një parking, ku ajo shihet e shtrirë në tokë ndërsa forcat e sigurisë i drejtojnë armët. Pranë saj gjendej një çantë shpine, e cila më pas u neutralizua nga ekspertët e piroteknikës përmes një shpërthimi të kontrolluar.
Autoritetet ruse nuk kanë dhënë ende detaje të plota mbi identitetin e saj apo rrethanat e ngjarjes. Pretendimet për përfshirjen e shërbimeve ukrainase nuk janë verifikuar në mënyrë të pavarur.
FSB ka njoftuar gjithashtu arrestimin e një burri nga Azia Qendrore, lindur në vitin 1997, i dyshuar për përfshirje në një plan sulmi me eksploziv. Sipas njoftimit zyrtar, i dyshuari besohet se vepronte në emër të një organizate të cilësuar si terroriste dhe se ishte gati të aktivizonte mjetin shpërthyes, ndërsa gruaja gjermane dyshohet se mund të jetë përdorur si pjesë e operacionit. FSB pretendon se veprimet e tij janë koordinuar nga persona të lidhur me shërbime speciale ukrainase, të cilët sipas Moskës janë paraqitur si pjesë e një organizate ndërkombëtare të ndaluar në territorin rus. Pala ukrainase nuk ka bërë ende ndonjë koment zyrtar lidhur me këto pretendime.