Libani përballet me dy opsione, SHBA konfirmon bisedimet mes Bejrutit dhe Izraelit për paqe
Pas raportimeve paraprake, një zyrtar i Departamentit të Shtetit amerikan ka konfirmuar se bisedimet mes ambasadorëve të Libanit dhe Izraelit do të mbahen në Uashington të enjten. “Ne do të vazhdojmë të lehtësojmë diskutimet e drejtpërdrejta dhe me mirëbesim mes dy qeverive,” tha zyrtari, duke shtuar se Shtetet e Bashkuara mirëpresin “angazhimin produktiv” që nisi më 14 prill.
Izraeli dhe Libani morën pjesë në raundin e parë të bisedimeve diplomatike, që nga viti 1993, në Uashington javën e kaluar.
Presidenti i Libanit deklaroi sot se qëllimi i negociatave me Izraelin është t’i jepet fund armiqësive dhe pushtimit të Libanit jugor. “Libani përballet me dy opsione: ose vazhdimin e luftës me të gjitha pasojat e saj humanitare, sociale, ekonomike dhe sovrane, ose negociatat për t’i dhënë fund kësaj lufte dhe për të arritur stabilitet të qëndrueshëm,” tha ai. “Unë kam zgjedhur negociatat dhe jam plot shpresë se do të jemi në gjendje ta shpëtojmë Libanin.”
Synimet e Izraelit përcaktohen nga shqetësimet për sigurinë përgjatë kufirit të përbashkët me Libanin. Benjamin Netanyahu tha se çarmatimi i Hezbollahut është një nga kërkesat themelore të Izraelit nga bisedimet.