“`html
Investimet në digjitalizim do të përmirësojnë përvojën e klientëve
Intervistë me Mirsad Haliti, Drejtor i Përgjithshëm i ProCredit Bank Shqipëri
Viti 2026 pritet të jetë kyç për sektorin bankar, duke shënuar një kalim nga rritja e shpejtë drejt një rritjeje të qëndrueshme dhe të përgjegjshme.
Mirsad Haliti, Drejtor i Përgjithshëm i ProCredit Bank Shqipëri, thekson se sfidat kryesore për sektorin përfshijnë ruajtjen e cilësisë së portofolit në një mjedis ekonomik më të pasigurt, menaxhimin e rrezikut, përmbushjen e kërkesave rregullatore dhe përshpejtimin e digjitalizimit. Ai nënvizon nevojën që bankat të ruajnë disiplinë të fortë në huadhënie, të investojnë në teknologji dhe menaxhim rreziku, duke mbështetur njëkohësisht ekonominë. Sfida reale, sipas tij, nuk është thjesht rritja, por rritja me përgjegjësi dhe stabilitet afatgjatë.
Në një mjedis ekonomik dhe rregullator kompleks, përparësitë e bankës do të mbeten ruajtja e cilësisë së portofolit dhe përshpejtimi i transformimit digjital, me synimin afatgjatë për t’u bërë një bankë që e vendos përvojën mobile në qendër të shërbimeve të saj.
Si e vlerësoni ecurinë e aktivitetit të bankës suaj gjatë vitit të kaluar dhe cilat ishin zhvillimet më të rëndësishme për sektorin bankar?
Viti 2025 ka sjellë zhvillime të shumta për ProCredit Bank Shqipëri. Banka u fokusua në rritjen cilësore të portofolit, forcimin e bazës së klientëve aktivë dhe thellimin e digjitalizimit të shërbimeve bankare. Strategjia e bankës për këtë vit synoi një rritje të qëndrueshme, duke ruajtur standardet e menaxhimit të rrezikut dhe qeverisjes korporative.
Në këtë kuadër, ProCredit Bank ka vijuar forcimin e pozitës së saj në treg dhe ka investuar në linjat strategjike: përmirësimin e vazhdueshëm të kanaleve digjitale, automatizimin e proceseve dhe zgjerimin e gamës së shërbimeve online, me qëllim rritjen e efikasitetit operacional dhe ofrimin e një vlere të shtuar për klientët.
Si pjesë e këtij zgjerimi, në vitin 2025 është hapur edhe dega në Vlorë, pas disa degëve të reja të hapura në vitin paraardhës. Një risi e rëndësishme, për të cilën banka është krenare, janë pagesat me Apple Pay. ProCredit Bank u bë banka e parë në tregun shqiptar që lançoi Apple Pay në korrik 2025, duke u mundësuar klientëve të paguajnë me telefon ose orë inteligjente. Ky hap forcon pozicionimin e saj si bankë inovatore dhe përshpejton kalimin drejt pagesave moderne, të shpejta dhe të sigurta.
Në nivel sektori, zhvillimet më të rëndësishme gjatë vitit kanë qenë përshpejtimi i transformimit digjital, integrimi i Shqipërisë në zonën SEPA dhe përmirësimi i infrastrukturës së pagesave. Këto zhvillime kanë kontribuar në rritjen e përdorimit të bankingut digjital dhe pagesave elektronike, duke orientuar bankat drejt modeleve më efikase të operimit, të mbështetura në teknologji.
Paralelisht, sektori bankar ka ruajtur stabilitet financiar dhe likuiditet të lartë, duke treguar një qasje më të kujdesshme ndaj rritjes së ekspozimeve dhe një vëmendje më të madhe ndaj cilësisë së aktiveve. Megjithëse thellimi i digjitalizimit të produkteve dhe shërbimeve bankare është evident, dy vitet e fundit kanë shënuar gjithashtu një rritje të numrit të degëve dhe punonjësve në sektorin bankar.
Kur prisni të arrijmë në një fazë të reduktimit të pranisë fizike të bankave dhe zhvendosje në shkallë më të gjerë drejt bankingut digjital?
Edhe pse digjitalizimi i produkteve dhe shërbimeve bankare është thelluar ndjeshëm, kjo nuk e përjashton menjëherë nevojën për prani fizike të bankave. Prania fizike mbetet e rëndësishme, veçanërisht për klientët individë dhe bizneset e vogla, të cilët kanë nevojë për këshillim bankar dhe financiar, si dhe ndihmë për marrjen e kredive apo zgjedhjen e planeve më të përshtatshme për kursimet e tyre.
Rritja e numrit të degëve dhe punonjësve reflekton nevojën për të mbështetur rritjen e aktivitetit ekonomik dhe kërkesën për shërbime më të personalizuara. Në fazën aktuale, sektori bankar operon kryesisht në një model hibrid: kanalet digjitale mbulojnë shërbimet standarde dhe transaksionale, ndërsa degët fokusohen në këshillim të personalizuar.
ProCredit Bank, duke përqafuar digjitalizimin dhe transformimin e degëve në qendra këshillimi prej më shumë se një dekade, beson se u ofron klientëve komoditet dhe shërbime efikase. Strategjia e ProCredit bazohet në një model hibrid, ku kanalet digjitale plotësohen nga prania fizike e degëve në qytetet kryesore.
Nga këndvështrimi i tregut, një reduktim më i dukshëm i pranisë fizike pritet të ndodhë gradualisht, në një horizont afatmesëm dhe jo si një proces i menjëhershëm.
Në vijim të një cikli konsolidimi që zgjati rreth një dekadë, në vitin 2026, numri i bankave tregtare aktive në Shqipëri pritet të rritet për herë të parë pas 20 vjetësh. Besoni se ndodhemi në fillimet e një cikli të ri zgjerimi të bankave në treg apo në afat të gjatë, sistemi bankar do t’i kthehet përqendrimit dhe konsolidimit?
Fakti që në vitin 2026 pritet një rritje e numrit të bankave tregtare aktive në Shqipëri, për herë të parë pas dy dekadash, tregon interes të ri për tregun bankar shqiptar dhe një perceptim pozitiv për potencialin e tij afatmesëm. Nga këndvështrimi i digjitalizimit, kjo rritje lidhet edhe me shfaqjen e aktorëve të rinj dhe modeleve alternative të biznesit, si bankat digjitale apo fintech-et, të cilat e shohin tregun si të përshtatshëm për inovacion dhe rritje.
Megjithatë, në afat të gjatë, sektori bankar pritet të vazhdojë të karakterizohet nga cikle konsolidimi, të nxitura nga kërkesat rregullatore, investimet në teknologji dhe nevoja për shkallë ekonomie. Zgjerimi dhe konsolidimi nuk e përjashtojnë njëri-tjetrin, por pritet të alternohen në varësi të kushteve makroekonomike dhe zhvillimeve strukturore të tregut.
Vitin e kaluar, Banka e Shqipërisë vendosi për herë të parë disa kufizime direkte në huadhënien për blerjen e pasurive të paluajtshme rezidenciale, por sërish kredia në këtë segment vazhdoi rritjen me ritme të larta. Si i vlerësoni rreziqet e lidhura me ekspozimin në tregun e pasurive të paluajtshme dhe si do t’i përballonte sektori efektet e një krize të mundshme në këtë treg?
Vendosja e kufizimeve direkte nga Banka e Shqipërisë për huadhënien rezidenciale përfaqëson një hap të rëndësishëm drejt forcimit të stabilitetit financiar, duke zhvendosur fokusin nga volumi drejt cilësisë së kreditimit. Edhe pse kërkesa ka mbetur e fortë dhe kredia ka vijuar të rritet, sektori bankar ka hyrë në këtë fazë me pozicione më të forta kapitale dhe praktika më të përmirësuara të menaxhimit të rrezikut.
Rreziqet kryesore lidhen me luhatjet e çmimeve të pasurive të paluajtshme dhe përballueshmërinë e huamarrësve në një mjedis ekonomik më sfidues. Kufizimet mbi tregues si LTV (Loan-to-Value) dhe DSTI (Debt Service-to-Income) ndihmojnë në disiplinimin e kreditimit dhe reduktimin e rreziqeve të akumuluara.
Në rast të një korrigjimi të tregut, sektori pritet të përballojë efektet përmes politikave të kujdesshme të kreditimit, diversifikimit të portofolit dhe niveleve të qëndrueshme të kapitalit dhe likuiditetit. Në ProCredit, fokusi mbetet te financimi i bizneseve produktive dhe investimeve të qëndrueshme që sjellin ndikim pozitiv ekonomik, mjedisor dhe social.
Cilat mendoni se do të jenë çështjet dhe sfidat kryesore për sektorin bankar për vitin 2026?
Viti 2026 do të jetë kyç për sektorin bankar, ku fokusi do të kalojë nga rritja e shpejtë drejt rritjes së qëndrueshme dhe të përgjegjshme. Sfidat kryesore lidhen me ruajtjen e cilësisë së portofolit në një mjedis ekonomik më të pasigurt, menaxhimin e rrezikut, përmbushjen e kërkesave rregullatore dhe ESG (Environmental, Social, and Governance), si dhe përshpejtimin e digjitalizimit.
Në këtë kontekst, bankat duhet të ruajnë disiplinë të fortë në huadhënie, të investojnë në teknologji dhe menaxhim rreziku dhe, njëkohësisht, të mbështesin ekonominë. Sfida reale nuk është thjesht rritja, por rritja me përgjegjësi dhe stabilitet afatgjatë.
Për ProCredit Bank, viti 2026 është mbi të gjitha një vit i rritjes së qëndrueshme. Strategjia e tyre fokusohet në mbështetjen e sektorëve kyç të ekonomisë, veçanërisht mikro, vogla dhe të mesme (MSME) produktive, investimet e gjelbra dhe rritjen e efikasitetit operacional përmes një modeli hibrid që kombinon kanalet digjitale me këshillimin e specializuar.
Një objektiv shumë i rëndësishëm është rritja e konsiderueshme e bazës së klientëve retail. Viti nisi me prezantimin e një shërbimi të ri: hapjen e llogarisë 100% online për individët, duke e thjeshtëzuar procesin, kursyer kohë dhe mundësuar ofrimin e të gjithë ciklit të shërbimit për këtë segment tërësisht online.
Në një mjedis ekonomik dhe rregullator kompleks, përparësitë e ProCredit Bank mbeten ruajtja e cilësisë së portofolit dhe përshpejtimi i transformimit digjital, me synimin afatgjatë që të jenë një bankë që e vendos përvojën mobile në qendër të shërbimeve të saj.
“`