OKB paralajmëron: Shpërthimi i Ebolës mbetet masiv, ende nuk ka arritur kulmin
Përpjekjet për të frenuar përhapjen e Ebolës në lindje të Kongos kanë dhënë disa rezultate pozitive, por situata vijon të jetë kritike. Zyrtarët e Kombeve të Bashkuara paralajmërojnë se epidemia mbetet në përmasa të mëdha dhe se nevojiten ende muaj për të arritur nën kontroll të plotë të saj.
Julien Arnis, koordinatori special i OKB-së për Ebolën, deklaroi në një konferencë për shtyp në Gjenevë se në disa zona është vërejtur përparim, ndërsa në të tjera rastet vazhdojnë të shtohen. Ai e cilësoi situatën ende si një epidemi masive dhe vdekjeprurëse.
Edhe Organizata Botërore e Shëndetësisë ka bërë thirrje për kujdes. Olivier Le Poulin tha se është ende herët për të përcaktuar me siguri nëse epidemia e ka kaluar pikun.
Ndërkohë, ministri i Shëndetësisë i Kongos, Samuel Roger Kaba, kishte deklaruar më herët se kishte shenja inkurajuese, duke iu referuar një rënieje të transmetimit pas kulmit të epidemisë në mesin e gushtit. Sipas tij, numri i rasteve të reja ditore ka rënë nga rreth 120 në kulmin e epidemisë në rreth 80.
Po ashtu, 10 prej 62 zonave shëndetësore të prekura nuk kanë raportuar raste të reja për më shumë se 22 ditë. Kaba e konsideroi këtë një tregues pozitiv të efektivitetit të masave të ndërmarra në terren, por paralajmëroi se situata kërkon mobilizim të plotë dhe se rezultatet e deritanishme nuk duhet të çojnë në uljen e vigjilencës.
Epidemia aktuale është renditur si shpërthimi i dytë më vdekjeprurës i Ebolës i regjistruar ndonjëherë, pas epidemisë së Afrikës Perëndimore të viteve 2014-2016.
Sipas të dhënave më të fundit të qeverisë kongoleze, të publikuara të martën, në shtatë provinca janë konfirmuar 7,258 raste të Ebolës, ndërsa 3,510 persona kanë humbur jetën.