“`html
FORMULA 1/ Hamilton kritikon simulatorin e Ferrarit: Nuk shërben për asgjë
Vështirësitë e Lewis Hamilton me ekipin e Ferrarit vijojnë. Çmimi i Madh i Majemit nuk rezultoi aspak pozitiv për pilotin britanik. Gjatë periudhës së ndërprerjes për shkak të zhvillimeve në Lindjen e Mesme, piloti i Ferrarit u përgatit intensivisht për garën në Majemi, duke testuar konfigurime të ndryshme të makinës në kuadër të përgatitjeve para garës.
Megjithatë, Hamilton nuk arriti të zhvillonte një garë të mirë dhe fajësoi simulatorin për rezultatet e dobëta.
QASJE E RE PËR KANADËN
Pas Çmimit të Madh të Majemit, ku britaniku arriti vetëm vendin e gjashtë, duket se frustrimi i tij ka tejkaluar kufijtë. Hamilton po kërkon zgjidhje urgjente për të gjetur ritmin që i mungon, veçanërisht të premteve.
Për këtë arsye, ai vendosi të ndryshojë mënyrën e përgatitjes për garat: “Do ta përballoj garën e ardhshme me një qasje ndryshe, sepse mënyra se si po përgatitemi aktualisht nuk po shërben për asgjë”, deklaroi Hamilton me një ton të ftohtë dhe të prerë.
Britaniku mendon se orët e kaluara në simulator, mes ekraneve dhe pistonëve hidraulikë, nuk po përkthehen në përmirësime reale në pistë.
DËSHTIMI NË MAJEMI
Origjina e këtij “divorci” me teknologjinë e avancuar të Ferrarit lidhet me ngjarjet në Florida. Hamilton mbërriti në Majemi pas javësh pune intensive virtuale, duke rregulluar çdo parametër të veturës për formatin Sprint. Por sapo zbriti në pistë të premten, realiteti rezultoi krejt ndryshe.
“Gjatë përgatitjeve për këtë garë kam qenë çdo javë në simulues. Kam punuar vazhdimisht mbi korrelacionin”, zbuloi britaniku.
Problemi u shfaq që në sesionin e parë të provave të lira. Konfigurimi që dukej perfekt në botën virtuale rezultoi një katastrofë në realitet. Me vetëm një sesion stërvitor para kualifikueseve Sprint, hapësira për korrigjime ishte minimale dhe fundjava e tij u komprometua që në minutat e para.
“PA SIMULATOR”
Për një pilot të brezit të vjetër si Hamilton, simulatori ka qenë gjithmonë më shumë një domosdoshmëri sesa një pasion. “Në përgjithësi nuk më pëlqejnë simuluesit”, tha ai pa hezitim.
Ankesa kryesore e tij lidhet me mungesën e përputhjes mes ndjesive që merr në kabinën virtuale dhe asaj që makina transmeton në pistën reale.
“Hipën në simulator, përgatit pistën, e drejton makinën dhe e rregullon deri në një pikë të caktuar, por më pas mbërrin në pistën reale dhe ai konfigurim nuk funksionon”, u shpreh Hamilton.
Shtatë herë kampioni i botës preferon të mbështetet tek instinkti dhe tek të dhënat e mbledhura drejtpërdrejt në pistë. Në Kanada, një pistë ku historikisht ka pasur rezultate shumë të mira, do të shihet nëse kjo kthim tek “origjina” do ta ndihmojë të luftojë sërish për vendet e para, apo nëse mungesa e përgatitjes virtuale do t’i kushtojë në një kampionat ku çdo sekondë ka peshë.
TEKNOLOGJIA E FUNDIT
Simulatori që përdor Ferrari konsiderohet një nga më të mirët në Formula 1. Ai u rinovua plotësisht në vitin 2021 dhe është i pajisur me teknologjinë më të avancuar në treg. Të dhënat që gjeneron janë jashtëzakonisht të afërta me ato që shihen në pistë reale.
Sistemi përfshin ekranet më moderne dhe teknologjinë më të mirë për të riprodhuar çdo pistë me saktësi maksimale, çka i bën edhe më të bujshme kritikat e Hamilton ndaj simulatorit.
“`