Hantavirus në anijen turistike: A po përballemi me një pandemi të re? Çfarë dihet për virusin që përhapet nga brejtësit
Numri i rasteve të dyshuara me hantavirus në një anije turistike në Atlantik ka shkaktuar shqetësim ndërkombëtar, pas raportimeve për të paktën tre viktima dhe disa persona të tjerë të infektuar. Kjo situatë ka nxitur debate dhe ka krijuar konfuzion lidhur me rrezikshmërinë aktuale të virusit dhe mundësinë e përhapjes së tij.
Sipas analizës së patologut dhe studiuesit George Pappas, të dhënat ekzistuese nuk mbështesin një skenar pandemik. Ai thekson se hantaviruset, në përgjithësi, nuk transmetohen lehtësisht nga personi në person.
Çfarë dihet për virusin
Hantaviruset janë një grup virusesh që gjenden kryesisht te brejtësit. Këta të fundit i mbartin viruset pa u prekur nga sëmundja dhe i përhapin ato përmes sekrecioneve të tyre. Infektimi tek njerëzit ndodh zakonisht nëpërmjet:
- Kontaktit me ambiente të kontaminuara.
- Konsumimit të ushqimit të ndotur.
- Ekspozimit ndaj brejtësve.
Në varësi të rajonit, virusi mund të shkaktojë dëmtim të rëndë të veshkave ose të sistemit respirator. Normat e vdekshmërisë variojnë nga 10% deri në mbi 40% në disa variante amerikane.
Sipas Organizatës Botërore të Shëndetësisë (OBSH), anija turistike, me 88 pasagjerë dhe 49 anëtarë ekuipazhi, kishte nisur udhëtimin nga Argjentina. Rasti i parë serioz u shfaq shpejt pas nisjes, duke sugjeruar se infektimi kishte ndodhur para nisjes së udhëtimit. Më pas u raportuan edhe disa raste të tjera, kryesisht në mesin e personave që kishin pasur kontakt të afërt me pacientin e parë. Kjo ngriti dyshime për një variant që mund të ketë aftësinë të transmetohet mes njerëzve, siç është virusi i Andeve, i njohur për raste të rralla të përhapjes direkte mes individëve.
Rreziku dhe hetimet
Ekspertët theksojnë se skenari më i mundshëm është një shpërthim i izoluar brenda anijes dhe jo një kërcënim global. Megjithatë, hetimet po vijojnë dhe të gjitha kontaktet po monitorohen për një periudhë inkubacioni që mund të zgjasë deri në disa javë.
Sipas specialistëve, nuk ekziston një trajtim specifik apo vaksinë për hantavirusin. Parandalimi mbështetet kryesisht në shmangien e kontaktit me brejtësit dhe zonat e kontaminuara.
Autoritetet shëndetësore po ndjekin nga afër situatën, ndërsa rastet mbeten të izoluar në anije dhe nën mbikëqyrje të rreptë epidemiologjike.