Huamarrja e qeverisë në tregun e brendshëm do të rritet me 34% në tremujorin e fundit
Huamarrja e qeverisë në tregun e brendshëm pritet të shënojë një rritje ndjeshëm në tremujorin e fundit të vitit.
Sipas kalendarit të huamarrjes të Ministrisë së Financave, shuma e programuar për t’u financuar në tregun e brendshëm, duke përfshirë edhe rifinancimet e instrumenteve të maturuar, do të arrijë në 87 miliardë lekë. Kjo shifër paraqet një rritje prej 9.4% krahasuar me shumën e planifikuar për tremujorin e tretë dhe një rritje prej 34% krahasuar me planin e huamarrjes në të njëjtën periudhë të një viti më parë.
Shuma prej 87 miliardë lekësh është gjithashtu më e lartë se sa parashikohej në planin vjetor të huadhënies, i cili parashikonte emetime totale në vlerën e 78.5 miliardë lekëve për tre muajt e fundit të vitit. Rritja prej 8.5 miliardë lekësh mund të shpjegohet me mosplotësimin e plotë të ankandeve të deritanishme të këtij viti ose me rishpërndarje të strukturës së financimit të deficitit buxhetor.
Mbështetur në të dhënat e planit vjetor të huamarrjes, vlera e instrumenteve të borxhit që maturohen në tregun e brendshëm për tremujorin e katërt është rreth 42 miliardë lekë. Duke zbritur këtë shumë, vlera neto e huamarrjes për tremujorin e tretë vlerësohet në rreth 45 miliardë lekë, pothuajse e barabartë me gjithë huamarrjen vjetore neto të parashikuar në planin vjetor.
Huamarrja gjatë tremujorit të katërt do të dominohet nga obligacionet, si në numër ankandesh, ashtu edhe në vlerë emetimi. Nga 22 ankande gjithsej, 15 prej tyre do të jenë për emetim obligationsh, me maturim nga dy deri në pesëmbëdhjetë vjet. Obligacionet do të përbëjnë gjithsej 60% të shumës së planifikuar të huamarrjes për tremujorin e fundit.
Rritja e maturitetit mesatar të borxhit të brendshëm është një tendencë disavjeçare, që Ministria e Financave e ka ndërmarrë me qëllim uljen e rrezikut të rifinancimit. Në fund të qershorit, maturiteti mesatar i instrumenteve të borxhit të brendshëm u rrit më tej në 1179 ditë, nga 1002 ditë që kishte qenë në fund të vitit 2025. Maturiteti mesatar i borxhit është aktualisht në nivelet më të larta historike.
Kalendari i huamarrjes përfshin edhe ankande të reja të obligacioneve afatgjata, 10-vjeçare dhe 15-vjeçare, duke ofruar alternativa me kthime më të larta për investitorët e interesuar.
Ndërkohë, ankandet e bonove të thesarit po përdoren më pak, sidomos ato me maturim më të shkurtër se një vit. Në të gjithë tremujorin e fundit janë parashikuar tre ankande të tillë, nga të cilët dy me maturim 3-mujor dhe një me maturim 6-mujor. Katër ankandet e tjera janë ankande të bonove 12-mujore, që, për nga shuma e emetimeve, mbeten instrumenti kryesor i huamarrjes së brendshme.
Rritja e kërkesës së qeverisë për financim në tregun e brendshëm në tremujorin e fundit të vitit mund të gjenerojë presione të mëtejshme për yield-et. Që prej tremujorit të dytë të vitit, yield-et po shënojnë rritje graduale për të gjitha instrumentet, edhe në shtysën e pritshmërive më të larta për rritjen e normave të interesit.