“`html
Të huajt investojnë në prona: 53% e investimeve të huaja në Shqipëri shkuan në pasuri të paluajtshme në 6 muaj
Flukset e investimeve të huaja direkte (IHD) në Shqipëri shënuan një rritje të ndjeshme në gjysmën e parë të vitit 2026, duke arritur në 1.14 miliardë euro, krahasuar me 759.1 milionë euro në të njëjtën periudhë të vitit paraprak. Sipas të dhënave të publikuara nga Banka e Shqipërisë, rritja vjetore e këtyre investimeve arrin në 50.8%, ndërsa kontributi kryesor vjen nga sektori i pasurive të paluajtshme.
Vetëm në sektorin e pasurive të paluajtshme, fluksi i IHD-ve arriti në 609.6 milionë euro gjatë periudhës Janar-Qershor 2026, një shifër konsiderueshmërisht më e lartë se 252.9 milionë euro të regjistruara një vit më parë. Kjo përfaqëson një rritje prej 141.1% dhe konfirmon këtë sektor si destinacionin kryesor për kapitalin e huaj në vend.
Në vend të dytë për nga vëllimi i investimeve renditen aktivitetet financiare dhe të sigurimit, me 180.9 milionë euro, nga 147.4 milionë euro në gjysmën e parë të vitit 2025, duke shënuar një rritje prej 22.7%. Industria përpunuese ka gjithashtu një performancë të mirë, duke arritur në 92 milionë euro, me një rritje vjetore prej 58.2%.
Sektori i informacionit dhe komunikacionit ka parë një rritje të flukseve të investimeve deri në 47.3 milionë euro, duke u zgjeruar me 78.1%. Ndërtimi ka pothuajse trefishuar vlerën e investimeve, duke shkuar nga 11.9 milionë euro në 31.8 milionë euro, një rritje prej 166.5%. Tregtia me shumicë dhe pakicë ka arritur në 67.3 milionë euro, ndërsa sektori i energjisë, gazit dhe furnizimit me ujë ka regjistruar 65.7 milionë euro.
Flukset e investimeve janë përshpejtuar gjatë tremujorit të dytë të vitit. Investimet e huaja direkte arritën në 741.1 milionë euro në periudhën prill–qershor, krahasuar me 403.2 milionë euro në tre muajt e parë. Vetëm pasuritë e paluajtshme tërhoqën 438 milionë euro gjatë tremujorit të dytë.
Nga ana tjetër, industria nxjerrëse ka përjetuar një tkurrje të ndjeshme, me investimet që ranë nga 97.2 milionë euro në 27.6 milionë euro, ose 71.6% më pak. Transporti dhe magazinimi shënuan një rënie prej 31.5%, ndërsa sektori i akomodimit dhe shërbimit ushqimor ra me 27.1%.
Disa sektorë të tjerë, si bujqësia, pyjet dhe peshkimi, si dhe arsimi, regjistruan flukse neto negative në gjysmën e parë të vitit, duke qenë përkatësisht -3.2 milionë euro dhe -2.7 milionë euro.
Artikull nga Xhorxhina Deda / ScanTV
“`