Antiseptiku shkaktoi zjarr gjatë lindjes cezariane, nëna pëson djegie të rënda!
Një grua 24-vjeçare pësoi djegie të rënda gjatë një lindjeje cezariane në Pragë. Ngjarja ndodhi pasi një lëng antiseptik i ndezshëm ra në kontakt me një instrument elektrokirurgjik, duke shkaktuar zjarr në sallën e operacionit.
Incidenti u raportua të ketë ndodhur më 25 gusht në Spitalin Universitar Bulovka, në veri të kryeqytetit çek. Sipas informacioneve nga spitali, foshnja nuk ka pësuar lëndime.
Zëdhënësja e spitalit, Eva Stoletzda Lybigerova, ka shpjeguar se ndërhyrja cezariane ishte kryer për shkak të komplikacioneve serioze gjinekologjike. Ajo ka konfirmuar se gjendja e nënës është aktualisht e qëndrueshme dhe nuk ka nevojë për trajtim në terapi intensive.
Mediat çeke raportojnë se gruaja ka pësuar djegie në pjesën e poshtme të barkut, në kofshë, brinjë dhe në zonën gjenitale. Fillimisht, ajo është transferuar në një spital tjetër të specializuar për trajtimin e djegieve të rënda në Pragë, para se të rikthehej në Spitalin Bulovka.
Autoritetet e spitalit kanë nisur një hetim për incidentin. Ngjarja po konsiderohet si një komplikacion i rrallë, i shkaktuar nga kontakti i një substance të ndezshme me pajisjet elektrokirurgjikale.
Spitali Universitar Bulovka është një nga institucionet më të mëdha universitare shëndetësore në Pragë. Ky spital u përfshi edhe në një incident tjetër të rëndë në vitin 2024, kur një paciente iu nënshtrua gabimisht një procedure aborti pas një ngatërrimi mes dy pacienteve.