Mësuesi hero në Nepal shpëton 900 nxënës nga përmbytja
Një tragjedi e madhe ka goditur luginën Trishuli në veri-qendër të Nepalit, ku përmbytjet e fuqishme kanë shkatërruar banesa, ura, rrugë dhe infrastrukturë, duke shkaktuar humbjen e jetës së qindra personave dhe zhdukjen e mijëra të tjerëve.
Në këtë situatë kaosi, një mësues 47-vjeçar, Rajendra Dawadi, arriti të shpëtonte qindra nxënës. Ai dha alarmin pasi mori informacion se lumi po dilte nga shtrati dhe një fshat më lart ishte përmbytur. Në momentin e paralajmërimit, rreth 900 nxënës ndodheshin në kompleksin e Shkollës së Mesme Tribhuvan Trishuli, ku Dawadi jepte mësim anglisht.
Menjëherë, ai urdhëroi evakuimin e nxënësve drejt zonave më të larta dhe kontaktoi drejtuesit e autobusëve që transportonin nxënës, duke u kërkuar të ktheheshin. Njëri prej autobusëve arriti të kalonte në anën tjetër të një ure në momentin që niveli i ujit po rritej me shpejtësi, pak para se ura të shembej.
Nxënësit u larguan shpejt drejt terrenit të lartë. Një nxënës pësoi atak paniku dhe u transportua me motoçikletë, ndërsa pjesa tjetër u larguan në këmbë. Sipas raportimeve, të gjithë fëmijët e shkollës arritën të shpëtonin. Fatkeqësisht, dy pjesëtarë të stafit, mësuesi Santos Pariyar dhe drejtori Sultan Lama, humbën jetën në këtë katastrofë.
Kur banorët e cilësuan Dawadin hero, ai u përgjigj thjesht: “Çfarë tjetër mund të kisha bërë?”.
Sipas analizave paraprake, ngjarja u shkaktua nga shkëputja e një mase të madhe akulli dhe shkëmbinjsh nga rajoni Langtang Lirung, pranë kufirit Nepal-Tibet. Kjo masë ra rreth 1,200 metra në një grykë të thellë, duke gjeneruar një rrjedhë gjigante uji, balte, akulli dhe shkëmbinjsh, e cila përfshiu lugina, duke marrë me vete gjithçka.
Vendbanime të tëra u dëmtuan ose u shkatërruan, urat dhe rrugët u shembën, dhe rrjedha e lumenjve ndryshoi. Shkencëtarët paralajmërojnë se ngrohja e klimës po rrit paqëndrueshmërinë në Himalaje. Shkrirja e akullnajave dhe e tokave të ngrira përhershëm mund të dobësojë shpatet malore dhe të shtojë rrezikun për shembje, rrëshqitje dhe përmbytje të menjëhershme.
Katastrofa në luginën Trishuli është një nga shembujt më dramatikë të rrezikut me të cilin përballen komunitetet që jetojnë poshtë zonave akullnajore të Himalajeve.