“`html
Dy operatorët celularë fituan mbi 35 milionë euro vitin e kaluar
Fitimi i operatorëve celularë në vend shënoi rritje për të tretin vit radhazi gjatë vitit 2025. Sipas të dhënave të raportuara nga Autoriteti i Konkurrencës dhe Komunikimeve Elektronike (AKEP), për vitin e kaluar, Vodafone Albania regjistroi një fitim neto prej rreth 1.7 miliardë lekë, duke shënuar një rritje prej 42% krahasuar me një vit më parë.
Një fitim me vlerë të ngjashme raportoi edhe operatori i dytë, One Albania. Megjithatë, ky i fundit e ka përmirësuar ndjeshëm rezultatin e tij krahasuar me vitin paraprak. Sipas AKEP, One Albania e mbylli vitin 2025 me një fitim neto prej 1.7 miliardë lekësh, duke shënuar një rritje mbresëlënëse prej 257% krahasuar me një vit më parë.
Në total, të dy operatorët celularë siguruan një fitim prej afërsisht 3.4 miliardë lekësh (mbi 35 milionë euro) për vitin 2025. Kjo shifër përfaqëson një rritje prej 102% krahasuar me një vit më parë dhe arrin nivelin më të lartë të fitimeve të tyre në gjashtë vitet e fundit.
Në mungesë të pasqyrave financiare të detajuara, mund të vlerësohet se rritja e çmimeve të shërbimeve të komunikimit po ndikon pozitivisht në bazën e të ardhurave të operatorëve dhe në rritjen e fitimeve të tyre.
Gjatë vitit të kaluar, dy operatorët kryesorë të rrjeteve celulare, Vodafone Albania dhe One Albania, raportuan të ardhura nga komunikimet elektronike në vlerën e 28.95 miliardë lekëve, duke shënuar një rritje prej 3.7% krahasuar me një vit më parë. Ulja e numrit të operatorëve celularë nga tre në dy, si dhe rezultatet financiare më pak të favorshme të tyre në periudha të mëparshme, kanë kontribuar në shtrenjtimin gradual të paketave të komunikimit.
“`