“`html
Çfarë po ndodh me Revolucionin e Flamingove dhe a po nxit Kuvendi përçarjen mes organizatorëve?
Publikuar më 18.07.2026 nga shekulli_admin
TIRANË – Protesta e nisur në fund të Majit kundër ndërtimeve në zonën e Nartës dhe Pishë Poros, së fundi po hedh themelet e një lëvizjeje politike. Gjatë ditës së sotme, në Tiranë, një pjesë e pjesëmarrësve organizuan Kuvendin e parë të protestës, ku më shumë sesa idetë, u shpalosën ndasitë mes të pranishmëve.
Që në fillim, përfaqësuesit e PPNEA (Organizata për Ruajtjen dhe Mbrojtjen e Mjedisit Natyror në Shqipëri), si dhe një pjesë e mirë e influencerve, kërkuan që protesta të fokusohej në shfuqizimin e ligjit për zonat e mbrojtura, i cili lejon ndërtime. Këto kërkesa gjetën mbështetje edhe nga eurokomisionerë të ndryshëm që vizituan kohët e fundit Tiranën.
Megjithatë, një pjesë tjetër e protestuesve dhe pjesëmarrësve kërkuan që kjo lëvizje, e quajtur “Revolucioni i Flamingove”, të hedhte themelet për ndryshimin e klasës politike, ndërsa në Bulevardin “Dëshmorët e Kombit” jehonin thirrje kundër politikanëve.
Me kalimin e ditëve, numri i pjesëmarrësve në protestë është ulur, ndërsa është distancuar edhe nga aktet e dhunës që janë regjistruar para Parlamentit. Megjithatë, në një kohë kur kjo protestë nuk ka një lidership të identifikuar, edhe përfituesit e saj mbeten të dyshimtë, njësoj si pikëpyetjet që ngrihen për Kuvendin e sotëm.
Një nga organizatorët e Kuvendit të Protestës, Kastriot Çipi, shkruan në një reagim në rrjetet sociale se në takimin e sotëm ishin të pranishëm shumë “patronazhistë” të Partisë Demokratike (PD) dhe Partisë Socialiste (PS).
“Kuvendi lindi. Tani detyra jonë është ta rrisim, ta bëjmë organizatë të bazuar në demokracinë direkte, që lufton për demokracinë direkte në Shqipëri. Sa legjitimë jemi? Atë e tregojnë numrat. Sot ishim disa qindra. Nesër do të bëhemi mijëra. Ama nuk pranojmë leksione morali, prej atyre, që flasin në emër të protestës, sikur protesta të ishte shpk me një pronar të vetëm dhe ata pronari. Askush nuk është pronari i protestës. Askush nuk është as pronar i Kuvendit. Sot dera ishte e hapur për të gjithë, kështu na hynë boll patronazhistë, të PS e të PD. Nesër e tutje, në Kuvend hyjnë ata që deklarohen pro Kuvendit dhe nuk kanë teserë të asnjë partie”, shkruan Çipi.
Ndërkohë, analisti Dritan Hila, i quan pjesëmarrësit në Kuvend një ” tufë gjysmakësh”.
“Dmth protesta prodhoi këta të kuvendit? Produkt i një turme që nuk dinë të artikulojnë një mendim, që kanë inat me gjithë botën për dështimet e tyre, llumi që përdorin shërbimet inteligjente për të përmbysur një rend kushtetues dhe sjellë trazira. Pastaj tifozët janë fare në fund, se nëse organizatorët e bëjnë për lek, këta marrin për kot”, shkruan Hila.
Megjithë mbajtjen e Kuvendit, qytetarët janë mbledhur edhe sot në protestë, ndërsa kërkojnë anulimin e ligjit, për të cilin qeveria shqiptare ka premtuar në Bruksel rishikimin e të gjitha direktivave që nuk përputhen me Bashkimin Europian.
Tashmë që numri i pjesëmarrësve në protestë është ulur, i ndikuar edhe nga koha e gjatë e rezistencës, nuk kanë munguar idetë që ajo të ndërpritet përkohësisht, për t’u rikthyer në Shtator. A do të ia dalë Kuvendi i sotëm ta shndërrojë këtë lëvizje në fuqi politike, apo do të thellojë përçarjen mes pjesëmarrësve? Këtë përgjigje mund ta marrim brenda këtyre javëve, duke lexuar numrat dhe qëndrimet në shesh.
“`