“`html
Hyrja në SEPA sjell rritje prej gati 29% në transfertat ndërkombëtare për tremujorin e parë
Transfertat ndërkombëtare të nisura nga sektori bankar shqiptar kanë shënuar një rritje të ndjeshme në tremujorin e parë të këtij viti. Sipas statistikave të Bankës së Shqipërisë, klientët e sektorit bankar shqiptar kanë nisur 1 milion e 51 mijë transferta jashtë vendit, duke shënuar një rritje prej 28.5% krahasuar me të njëjtën periudhë të vitit të kaluar.
Kjo rritje është vënë re si tek klientët individë, ashtu edhe tek bizneset:
- Individët kanë nisur pothuajse 893 mijë transferta jashtë vendit, 29% më shumë krahasuar me tremujorin e parë të vitit të kaluar.
- Bizneset kanë nisur 159 mijë transferta, duke shënuar një rritje prej 24% krahasuar me të njëjtën periudhë të një viti më parë.
Rritja e transfertave ndërkombëtare ishte e dukshme edhe në vlerë. Statistikat tregojnë se shuma e transfertave ndërkombëtare të nisura nga klientët e sektorit bankar shqiptar arriti në 280.6 miliardë lekë, duke u rritur me 12.5% krahasuar me një vit më parë.
Krahas zgjerimit të veprimtarisë ekonomike dhe rritjes së përfshirjes financiare, rritja e transfertave ndërkombëtare mund t’i atribuohet edhe efekteve të përfshirjes në Zonën e Vetme të Pagesave në Euro (SEPA), duke filluar nga tetori i vitit të kaluar. Kjo përfshirje ka sjellë një ulje të ndjeshme të komisioneve të transfertave ndërkombëtare për publikun shqiptar.
Sipas rregullores së miratuar nga Banka e Shqipërisë, nivelet maksimale të komisioneve për transfertat e brendshme do të jenë të vlefshme edhe për transfertat ndërkombëtare nëpërmjet SEPA. Konkretisht:
- Komisioni minimal që bankat mund të aplikojnë për transfertat kombëtare në monedhën europiane, të kryera nëpërmjet e-banking, nuk mund të jetë më i lartë se 2 euro.
- Për transferta me vlerë deri në 100 mijë euro, të kryera me e-banking, totali i komisioneve nuk mund të jetë më i lartë se 0.01% e vlerës së transferuar. Kjo do të thotë se për shumën maksimale të këtij tavanit (100 mijë euro), komisioni maksimal do të jetë 10 euro.
- Për transferta me vlerë deri në 100 mijë euro, të kryera në degë (në formë letër), totali i komisioneve nuk mund të jetë më i lartë se 0.02% e vlerës së transferuar.
Për transfertat me vlerë mbi 100 mijë euro, pavarësisht shumës së transferuar, komisionet maksimale që bankat mund të aplikojnë janë:
- 50 euro për transfertat e kryera në degë.
- 25 euro për transfertat e nisura nëpërmjet kanaleve elektronike.
Shqipëria u pranua zyrtarisht si anëtare e zonës SEPA nga Këshilli Europian i Pagesave më 21 nëntor 2024. Më parë, sektori bankar në Shqipëri i ekzekutonte transfertat ndërkombëtare nëpërmjet bankave të huaja korrespondente, një proces që shoqërohej me komisione të larta dhe kohë relativisht të gjatë për kryerjen e tyre.
“`