Bilanci i tërmetit në Venezuelë rëndohet: 5.208 viktima, mijëra të pastrehë
Numri i personave që kanë humbur jetën nga tërmeti i dyfishtë që goditi Venezuelën më 24 qershor ka shkuar në 5.208, sipas shifrave zyrtare të fundit të publikuara të dielën nga presidenti i Parlamentit, Jorge Rodriguez.
Një ditë më parë, autoritetet kishin raportuar 5.119 viktima, ndërsa numri i të plagosurve mbetet 16.740. Vetëm në 24 orët e fundit janë konfirmuar rreth 100 viktima të tjera.
Këto shifra vijnë më shumë se tre javë pas tërmeteve me magnitudë 7.2 dhe 7.5 ballë, të cilët shkaktuan dëme të mëdha, kryesisht në pjesën veriore të vendit dhe veçanërisht në shtetin bregdetar La Guaira, pranë kryeqytetit Caracas.
Autoritetet nuk kanë bërë ende publik numrin e personave të zhdukur. Menjëherë pas katastrofës, Kombet e Bashkuara vlerësuan se numri i të zhdukurve mund të arrinte deri në 50.000, ndërsa vlerësime të tjera e vendosin atë pranë 10.000.
Në zonën e La Guaira, ekipet e shpëtimit vazhdojnë operacionet për nxjerrjen e viktimave nga rrënojat e ndërtesave të shembura.
Ndërkohë, mbi 21.000 persona kanë mbetur pa strehë dhe vazhdojnë të jetojnë në më shumë se 100 kampe të përkohshme. Sipas bilancit zyrtar, 856 ndërtesa kanë pësuar dëmtime, ndërsa 190 prej tyre janë shembur plotësisht.