“`html
Tregu televiziv në vitin 2025 arrin 70 milionë euro, “TV Klan” dhe “Top Channel” dominojnë me 63%
Të ardhurat e 10 televizioneve kryesore në Shqipëri, në vitin 2025, arritën në rreth 6.8 miliardë lekë, ose afërsisht 70 milionë euro. Krahasuar me vitin paraprak, të ardhurat shënuan një rritje të lehtë prej 3%, pas një rënieje prej 0.5% në vitin 2024. Kjo rritje, megjithatë, mbetet larg ritmeve dyshifrore të zgjerimit të regjistruar në vitin 2023 (14%). Të dhënat janë përpunuar nga “Monitor”, bazuar në bilancet e kompanive të dorëzuara në Qendrën Kombëtare të Biznesit. Të ardhurat e operatorëve televizivë burrojnë kryesisht nga reklamat dhe nga shitja e sinjaleve të transmetimit.
“TV Klan” dhe “Top Channel”, dy televizioneve më të mëdha në vend, vijojnë të dominojnë qartë skenën mediatike, duke zotëruar së bashku 63% të tregut në vitin 2025. Nga nëntë televizione që kanë raportuar bilancet e vitit 2025, vetëm dy prej tyre kanë shënuar rënie të të ardhurave, ndërsa pjesa tjetër kanë arritur rritje të lehta me ritme njëshifrore.
Edhe pse mund të kenë një ndikim të konsiderueshëm përmes audiencës së tyre, televizionet, sidomos ato të lajmeve, nuk rezultojnë një biznes veçanërisht fitimprurës, me përjashtim të dy të mëdhenjve. Në vitin 2025, rezultati financiar i nëntë televizioneve ishte vetëm 550 milionë lekë (më pak se 6 milionë euro), ndërsa katër prej tyre operuan me humbje. Nëse përjashtojmë televizionet me humbje, fitimet ishin 836 milionë lekë, ku 87% e tyre i përkisnin “Klan” dhe “Top Channel”. Krahasuar me vitin 2024, shumica e televizioneve përmirësuan fitimet, por ato mbeten të ulëta në raport me kapitalin e investuar dhe të ardhurat. Tregu televiziv shqiptar ka hyrë prej vitesh në një ngërç, i ndikuar nga kriza ekonomike dhe mungesa e hyrjes së kompanive të reja në vend, gjë që ka prekur buxhetet e reklamave dhe rrjedhimisht edhe të ardhurat e televizioneve.
Një ndikim tjetër vjen nga zhvillimi i platformave digjitale, ku reklamuesit po transferojnë më shumë buxhet për të arritur audienca më të targetuara. Biznesi televiziv po konkurrohet ndjeshëm nga zhvendosja e reklamave drejt rrjeteve sociale dhe marketingut të drejtpërdrejtë përmes influencuesve. Kohët e fundit, tatimet njoftuan fillimin e hetimeve ndaj rreth 100 individëve/subjekteve për të ardhurat e përfituara nga platformat sociale si Facebook, TikTok, YouTube, Instagram, Google dhe PayPal. Dyshohet se nga verifikimet paraprake janë rreth 33 milionë euro të padeklaruara, një shumë që përbën 47% të të ardhurave të gjeneruara nga 10 televizionet kryesore në vitin 2024, ku burimi kryesor ishin reklamat.
Një problematikë tjetër është mungesa e matjes së audiencës. Një raport i “Top Channel” thekson se, edhe pse tregu i mediave televizive përthith pjesën më të madhe të investimit në publicitet, duke e bërë atë tërheqës për investitorët, ekzistojnë barriera rregullatore dhe financiare. Ndërkohë, një raport i Vizion Plus nënvizon se mungesa e një tregu të formuar dhe e matësve të audiencës rrit kostot e segmentimit.
Tregu televiziv kërkon gjithashtu investime të vazhdueshme, të cilat nuk përballohen lehtë nga të ardhurat dhe rentabiliteti aktual. Raporti i “Top Channel” thekson se zhvillimi i shpejtë i teknologjisë së transmetimeve televizive kërkon investime të vazhdueshme, të cilat janë sfiduese për tregun shqiptar për shkak të popullsisë së vogël dhe të ardhurave për frymë më të ulëta krahasuar me vendet e BE-së.
Renditja e televizioneve:
- “TV Klan” kryeson renditjen si televizioni më i madh në vend prej vitesh. Në vitin 2025, të ardhurat e tij ishin 2.3 miliardë lekë, me një rritje vjetore prej 3.2%. Burimi kryesor i të ardhurave mbetet transmetimi i spoteve publicitare (1.3 miliardë lekë), i ndjekur nga të ardhurat nga sinjali, reklamat në ueb dhe platformat OTT, si dhe abonimet. Televizioni raportoi fitime prej 484 milionë lekësh, me një rritje prej 56%, kryesisht për shkak të uljes së kostove për blerjen e të drejtave televizive dhe shpenzimeve administrative.
- “Top Channel” pozicionohet i dyti. Të ardhurat e tij në vitin 2025 ishin 1.95 miliardë lekë, me një zgjerim prej 3.3%. Fitimet para taksave arritën 242 milionë lekë, me rritje 54%.
- “Media Vizion” (Vizion Plus) raportoi të ardhura prej 655 milionë lekë, pothuajse në të njëjtin nivel me vitin paraprak. Fitimet ishin minimale, 25 milionë lekë, nga 22 milionë lekë në 2024-n.
- “TV A2”, i katërti më i madh, nuk ka deklaruar ende bilanc për vitin 2025. Në vitin 2024, të ardhurat ishin 446 milionë lekë dhe fitimet 4.2 milionë lekë.
- “ABC News” raportoi rritje të ardhurash me 29%, duke arritur 376 milionë lekë, pas një rënieje në 2024-n. Televizioni deklaroi për herë të parë një fitim prej 85 milionë lekësh.
- “Report TV” (MTSC) deklaroi të ardhura prej 309 milionë lekë, me rritje 6%, por raportoi humbje prej 18 milionë lekësh.
- “News 24” raportoi rritje të të ardhurave me 6%, duke arritur 274 milionë lekë, ndërsa deklaroi humbje prej 114 milionë lekësh.
- “EuroNews” ka deklaruar rënie të të ardhurave për të dytin vit radhazi, duke arritur 185 milionë lekë. Kompania vijon të jetë me humbje, që në 2025 ra në 109 milionë lekë.
- “Scan”, me fokus në lajmet ekonomike, shënoi rritje të të ardhurave me 46%, duke arritur 174 milionë lekë, dhe kaloi nga humbjet në fitim minimal.
- “MCN TV” (Johaniteri) pati një vit me rënie të të ardhurave prej rreth 33%, duke arritur 72 milionë lekë, ndërsa vijon të ketë humbje, që arritën në 49 milionë lekë.
- “Syri TV” nuk deklaron bilanc që nga viti 2023, kur të ardhurat ishin 13 milionë lekë.
- Tre televizione të tjera, FAX NEWS (Fax Media Neës), TV ORA (“Ora” sh.a), dhe ORA NEWS/ O.Liperi, janë në kushte të vështira financiare, megjithëse vazhdojnë të transmetojnë sinjal.
“`