Turistët kontribuan zyrtarisht me një rekord prej 2.38 miliardë eurosh në gjashtëmujorin e parë
Rikthimi i Shqipërisë si një destinacion turistik i preferuar ka sjellë rritje edhe të të ardhurave nga shpenzimet e shtetasve të huaj. Pavarësisht komenteve të përgjithshme se në vend vijnë turistë “kurnacë”, të cilët nuk janë të gatshëm të harxhojnë shumë, numri i tyre i lartë reflektohet në një sasi më të madhe valutë të huaj në vend. Në të njëjtën kohë, shpenzimet e shqiptarëve jashtë vendit janë rritur më pak.
Të dhënat e Bankës së Shqipërisë, publikuar në bilancin e pagesave, tregojnë se në gjashtëmujorin e parë të vitit 2026, shpenzimet e të huajve që kanë udhëtuar në Shqipëri arritën në total 2.38 miliardë euro. Kjo është shifra më e lartë e regjistruar ndonjëherë për gjashtëmujorin e parë pas vitit 1990.
Shpenzimet e të huajve për udhëtime janë rritur me 13.4% krahasuar me të njëjtën periudhë të vitit të kaluar. Të dhënat e INSTAT-it konfirmojnë se në gjashtë muajt e parë të vitit, vendi u vizitua nga rreth 5.1 milionë shtetas të huaj, duke shënuar një rritje prej 6.2% krahasuar me të njëjtën periudhë të një viti më parë.
Pas një fillimi të dobët në muajt e parë, për shkak të motit të pafavorshëm, turizmi u gjallërua në periudhën pasuese. Muaji maj shënoi kulmin me 16% më shumë hyrje, ndërsa qershori pa një ngadalësim (1.8%). Shtetasit nga Kosova vazhdojnë të jenë në krye, duke përbërë rreth një të tretën e hyrjeve, të ndjekur nga italianët me rreth 11% të totalit.
Bazuar në të dhënat e Bankës së Shqipërisë për totalin e shpenzimeve dhe ato të INSTAT-it për numrin e hyrjeve, rezulton se një shtetas i huaj ka shpenzuar mesatarisht 470 euro për person në Shqipëri gjatë gjashtëmujorit të parë të vitit 2026, krahasuar me 440 euro në të njëjtën periudhë të vitit të kaluar.
Shqiptarët nuk kursejnë jashtë vendit
Rritja e linjave ajrore direkte me kosto të ulët nga Tirana, si dhe rritja e kostove të jetesës në vend, kanë bërë që shumë shqiptarë të zgjedhin të udhëtojnë jashtë vendit. Sipas të dhënave të Bankës së Shqipërisë, gjatë gjashtëmujorit të parë të vitit, shpenzimet e shqiptarëve për udhëtime jashtë ishin 1.4 miliardë euro, me një rritje prej 9.5% krahasuar me të njëjtën periudhë të vitit të kaluar. INSTAT raporton se në gjashtë muajt e parë të vitit u regjistruan rreth 4.2 milionë dalje të shtetasve shqiptarë, me një rritje prej 5.1% krahasuar me të njëjtën periudhë të vitit të kaluar. Shpenzimi mesatar i një shqiptari jashtë vendit rezulton rreth 340 euro.
Shqipëria përfiton 957 milionë euro nga turizmi
Megjithëse të huajt kanë shtuar shpenzimet në Shqipëri, e njëjta tendencë vërehet edhe te shtetasit shqiptarë që udhëtojnë jashtë vendit. Megjithatë, më shumë para kanë mbetur në vend. Sipas Bankës së Shqipërisë, bilanci i udhëtimeve, i cili mat diferencën mes shpenzimeve të të huajve në Shqipëri dhe atyre të shqiptarëve jashtë, ishte 957 milionë euro në gjashtëmujorin e parë të vitit, duke iu afruar shifrës prej 1 miliard eurosh.
Që prej vitit 2015, Shqipëria ka një bilanc pozitiv të udhëtimeve, i cili është rritur vit pas viti, duke arritur një rekord historik në gjashtëmujorin e parë të vitit.