“`html
Bordi ul lehtë çmimet e karburanteve
Nafta dhe benzina janë ulur me 2 lekë për litër.
Bordi i Transparencës ka publikuar çmimet e reja të karburanteve, të cilat hynë në fuqi këtë të martë në orën 14:00.
Në mbledhjen e radhës të datës 10 Qershor 2026, Bordi i Transparencës vendosi këto çmime:
- Çmimi i shitjes me pakicë i nënproduktit gazoil (standard SSH EN 590) do të jetë jo më shumë se 188 lekë/litër, ndërsa çmimi i shitjes me shumicë jo më shumë se 176 lekë/litër.
- Çmimi i shitjes me pakicë i nënproduktit benzinë (standard SSH EN) do të jetë jo më shumë se 171 lekë/litër, ndërsa çmimi i shitjes me shumicë jo më shumë se 159 lekë/litër.
Çmimet e caktuara nga Bordi do të jenë të vlefshme nga sot, data 10, ora 14:00, deri në mbledhjen e ardhshme të bordit, ku do të pasqyrohen ndryshimet e çmimeve të shitjes.
Tërheqim vëmendjen e çdo operatori të shitjes me shumicë dhe pakicë të nënprodukteve të naftës mbi detyrimin e zbatimit të këtij vendimi. Në rast të shkeljeve të konstatuara nga operatorë të ndryshëm, do të vendoset pezullimi i aktivitetit.
Ministria e Ekonomisë dhe Inovacionit, së bashku me Ministrinë e Financave dhe Ministrinë e Infrastrukturës dhe Energjisë, janë angazhuar të mbrojnë interesat e konsumatorëve shqiptarë dhe të ruajnë parimet e konkurrencës së ndershme në treg.
Sqarim:
Referuar Aktit Normativ nr. 1, datë 3.4.2026 “Për një shtesë në ligjin nr. 61/2012, “Për akcizat në Republikën e Shqipërisë,” të ndryshuar, parashikohet se në rast se çmimi i shitjes me pakicë për gazoilin është më i lartë se 220 lekë/litër, ose për benzinën është më i lartë se 200 lekë/litër, zbatohet niveli 80% i akcizës.
Bazuar në zbatimin e metodologjisë për llogaritjen e çmimeve tavan të shitjes me pakicë, çmimet e aktualisht janë nën kufirin e përcaktuar në Aktin Normativ nr. 1, datë 3.4.2026. Për këtë arsye, niveli i akcizës do të zbatohet i plotë, 100%.
Gazoili për peshkim:
Lidhur me çmimin e shitjes së gazoilit për peshkim, referuar Ligjit 9975, datë 28.07.2008 “Për taksat Kombëtare”, neni 9 “Përjashtimet nga pagimi i taksave kombëtare”, pika 6, parashikohet se anijet e peshkimit përjashtohen nga pagimi i taksës së qarkullimit dhe taksës së karbonit.
Gjithashtu, referuar nenit 10, pika 3 germa “d” të Ligjit 61/2012 “Për akcizat në RSH”, parashikohet përjashtimi nga detyrimet e akcizës i karburantit për anijet e peshkimit, në sasitë, kushtet dhe kriteret e përcaktuara në Vendimin e Këshillit të Ministrave.
Referuar metodologjisë së përcaktuar në aktin normativ, çmimi i shitjes së gazoilit për peshkim rezulton të jetë 92 lekë.
“`