Zjarr në një azil pleqsh në Bosnje: të paktën 10 të vdekur dhe 20 të plagosur
Një zjarr që shpërtheu të martën në mbrëmje në një azil pleqsh në Tuzla, në verilindje të Bosnjës, ka rezultuar në vdekjen e të paktën dhjetë personave dhe plagosjen e 20 të tjerëve.
Sipas një njoftimi për shtyp nga vetë azili, zjarri shpërtheu rreth orës 8:55 të mbrëmjes (ora lokale) në katin e shtatë të godinës.
Në katin ku ra zjarri, ndodheshin banorë me probleme lëvizjeje, dhe fatkeqësisht, dhjetë prej tyre humbën jetën. Mediat lokale, si Klix.ba, kishin raportuar më parë për numrin e viktimave.
Patrullat e policisë, zjarrfikësit dhe ambulancat kanë mbërritur menjëherë në vendngjarje për të evakuuar banorët dhe për të ofruar ndihmën e parë.
Një zëdhënëse e Qendrës Universitare Klinike në Tuzla konfirmoi se disa pacientë janë trajtuar për helmim nga monoksidi i karbonit. Ajo shtoi se tre pacientë janë shtruar në Klinikën e Mjekësisë së Brendshme për këtë arsye, dy prej tyre në njësinë e kujdesit intensiv, ndërsa një tjetër po vazhdon trajtimin në klinikën e pranimit.