Liban: Hezbollahu përjashton dialogun me Izraelin, kushti për negociata
Sekretari i përgjithshëm i Hezbollahut, Naim Qassem, ka deklaruar se grupi i mbështetur nga Irani nuk do të përfshihet në negociata të drejtpërdrejta me Izraelin. Ai theksoi se Hezbollahu do të vazhdojë atë që e quajti “rezistencë mbrojtëse” kundër sulmeve të vazhdueshme.
Në një deklaratë të detajuar me shkrim, Qassem argumentoi se Izraeli, me mbështetjen e Shteteve të Bashkuara, ka dështuar të mposhtë Hezbollahun. Sipas tij, forcat izraelite janë përballur me rezistencë të fortë dhe kanë arritur në një “rrugë pa krye”.
Një armëpushim në konflikt u shpall në mes të prillit nga presidenti amerikan Donald Trump, pas bisedimeve me kryeministrin izraelit Benjamin Netanyahu dhe presidentin libanez Joseph Aoun. Marrëveshja pritet të jetë në fuqi edhe për dy javë të tjera, megjithëse të dyja palët kanë vazhduar shkëmbimin e zjarrit.
Qassem paraqiti kushtet për çdo marrëveshje të mundshme, duke përfshirë:
- Ndalimin e plotë të armiqësive në tokë, det dhe ajër.
- Tërheqjen e Izraelit nga territoret e pushtuara.
- Lirimin e të burgosurve.
- Kthimin e banorëve të zhvendosur.
- Rindërtimin.
Ai theksoi se Hezbollahu nuk do të çarmoset, duke i cilësuar armët e tij si të domosdoshme për mbrojtje kundër asaj që e quajti agresion izraelit. Ai paralajmëroi se grupi do të vazhdojë t’u përgjigjet sulmeve.
Në përfundim, Qassem deklaroi se Hezbollahu do të vijojë luftën derisa të rikthehet çdo territor libanez i pushtuar. Ndërkohë, grupi nuk ka qenë drejtpërdrejt i përfshirë në bisedimet për armëpushimin Izrael-Liban, por ka sinjalizuar se do ta respektojë atë, për sa kohë që edhe Izraeli ndalon sulmet.
Qeveria libaneze nuk ka kontroll të drejtpërdrejtë mbi Hezbollahun, megjithatë, një rol kyç në negociata po luan kryetari i parlamentit dhe aleati i grupit, Nabih Berri.