Dhurata e pazakontë e Erdoganit për udhëheqësit e NATO-s! Starmer nuk mundi ta merrte me vete
Presidenti turk, Recep Tayyip Erdogan, u ka bërë një dhuratë të veçantë liderëve të pranishëm në Samitin e NATO-s në Ankara. Secilit prej tyre iu dhurua një revolver me emrin e tij të gdhendur dhe një kuti me fishekë të vërtetë.
Sipas mediave britanike, kryeministri i Mbretërisë së Bashkuar, Keir Starmer, zbuloi gjatë fluturimit të kthimit se nuk mundi ta merrte armën me vete, pasi importimi i saj në Britani do të shkelte ligjin.
Revolveri i Starmer mbeti në Ankara për t’iu nënshtruar procesit të çaktivizimit. Kjo ndodhi pavarësisht se presidenti Erdogan kishte bashkëngjitur një shënim personal, i cili përjashtonte dhuratën nga kufizimet turke për eksportin e armëve.
Starmer e cilësoi revolverin si “një zgjedhje veçanërisht të pazakontë dhurate” nga ana e presidentit turk. Përveç armës, Erdogan u kishte dhënë të gjithë liderëve një dokument të nënshkruar personalisht, me të cilin hiqeshin kufizimet turke për eksportin e revolverëve.
Megjithatë, ky dokument nuk ishte i mjaftueshëm për të kapërcyer legjislacionin e vendeve pritëse. Në rastin e Mbretërisë së Bashkuar, ligjet për armët janë ndër më të rreptat në botë, veçanërisht pas masakrës së Dunblane në vitin 1996, e cila çoi në ndalimin pothuajse të plotë të posedimit privat të pistoletave.
Nuk dihet ende nëse liderë të tjerë të NATO-s janë përballur me probleme të ngjashme për transportimin e dhuratës në vendet e tyre.
Dhuratat u shpërndanë gjatë Samitit të 36-të të NATO-s, i cili u mbajt më 7 dhe 8 korrik në kompleksin presidencial në Ankara. Ky ishte samiti i parë i Aleancës i organizuar nga Turqia që nga takimi i Stambollit në vitin 2004.
Gjatë samitit, liderët diskutuan mbi rritjen e shpenzimeve për mbrojtjen, mbështetjen për Ukrainën dhe mundësinë e rifillimit të shitjes së armëve amerikane për Turqinë, përfshirë një heqje të mundshme të kufizimeve për avionët luftarakë F-35.