Lideri i juntës së Nigerit vendos kushte për rihapjen e kufirit me Beninin
Kreu i juntës ushtarake në Niger, gjenerali Abdurahman Tiani, ka deklaruar se marrëdhëniet me Beninin fqinj ende mbartin “plagë” që duhet të “shërohen” përpara se të merret një vendim për rihapjen e kufirit mes dy vendeve.
Kufijtë mes Nigerit dhe Beninit kanë mbetur të mbyllur për tre vjet, që nga grushti i shtetit ushtarak në korrik 2023. Autoritetet ushtarake në Niger kanë akuzuar Beninin se, me mbështetjen e Francës, ka tentuar të destabilizojë vendin.
Megjithatë, vizita në Niger e presidentit të ri të Beninit, Romuald Ouattara, në fillim të qershorit, ka përmirësuar klimën mes dy vendeve dhe ka rritur shpresat për normalizimin e marrëdhënieve.
Në një intervistë për televizionin shtetëror, me rastin e trevjetorit të marrjes së pushtetit, gjenerali Tiani tha se ka vullnet nga të dyja palët për të kapërcyer mosmarrëveshjet.
“Shumë ujë ka rrjedhur në hendek. Ka plagë që duhen shëruar dhe trajtuar përpara se të merret një vendim i pakthyeshëm për hapjen e kufijve,” u shpreh ai.
Sipas Tianit, rihapja e kufirit duhet të garantojë stabilitet afatgjatë, në mënyrë që “asnjë president i Beninit apo Nigerit të mos vendosë një ditë t’i mbyllë sërish kufijtë”.