BE dhe Franca investojnë 118 milionë euro në Durrës për një sistem të ri trajtimi të ujërave të ndotura
Bashkimi Evropian (BE), Agjencia Franceze për Zhvillim (AFD) dhe Shqipëria kanë shënuar sot nisjen e fazës së parë të një projekti ambicioz për përmirësimin e infrastrukturës së ujërave të ndotura në Durrës, në përputhje me standardet evropiane. Ky investim synon të përmirësojë shërbimet sanitare për banorët dhe të afrojë Shqipërinë më pranë anëtarësimit në BE.
Investimi total prej 118 milionë eurosh përbëhet nga një grant prej 85 milionë eurosh nga BE, i ofruar përmes Kornizës së Investimeve për Ballkanin Perëndimor, dhe një kredi sovrane prej 33.4 milionë eurosh nga Agjencia Franceze për Zhvillim (AFD).
Projekti do të zbatohet nga Ministria e Infrastrukturës dhe Energjisë në bashkëpunim me Agjencinë Kombëtare të Ujësjellës-Kanalizimeve (AKUK). Përfaqësues të lartë nga AFD, Franca, BE, Ministria e Infrastrukturës dhe Energjisë dhe Bashkia e Durrësit kanë vizituar sot vendin ku do të zhvillohen punimet, të cilat pritet të fillojnë në vitin 2027.
Shefja e Bashkëpunimit të Delegacionit të BE-së në Shqipëri, Ritva Heikkinen, theksoi rëndësinë e këtij investimi, duke e cilësuar si një nga më të mëdhenjtë në grante nga BE në Shqipëri deri më sot. Ajo shtoi se përmirësimi i infrastrukturës së ujërave të ndotura sipas standardeve të BE-së është thelbësor për procesin e anëtarësimit dhe se ky projekt përbën një hap të rëndësishëm përpara për adresimin e nevojave mjedisore të vendit.
Drejtori Ekzekutiv i AFD-së, Christophe Lecourtier, shprehu krenarinë për nisjen e këtij projekti, duke nënvizuar se ai do të përmirësojë ndjeshëm menaxhimin e ujërave të ndotura në një nga qytetet dhe destinacionet turistike më të rëndësishme të Shqipërisë. Ai shtoi se investimi do të sjellë përfitime të prekshme për banorët, shëndetin publik dhe mbrojtjen e bregdetit Adriatik, duke qenë një shembull i bashkëpunimit të suksesshëm mes BE-së, Francës dhe Shqipërisë.
Rreth projektit:
- Aktualisht, vetëm rreth 20% e ujërave të ndotura të Durrësit trajtohen sipas standardeve të BE-së, duke shkaktuar ndotje të bregdetit Adriatik dhe kosto të larta mjedisore, ekonomike dhe shëndetësore.
- Projekti synon të rrisë mbledhjen dhe trajtimin e ujërave të ndotura me 85%, duke krijuar edhe rrjete të ndara për ujërat e shiut dhe ujërat e ndotura në qendrën historike të qytetit.
- 100,000 banorë të rinj do të lidhen me rrjetet e kanalizimeve, ndërsa kapaciteti i impiantit të trajtimit të ujërave të ndotura do të rritet për të shërbyer një popullsi ekuivalente prej 350,000 banorësh.
- Projekti do të kontribuojë drejtpërdrejt në përafrimin e Shqipërisë me standardet mjedisore evropiane, sipas Kapitullit 27 të negociatave të anëtarësimit në BE.
- Nisja e projektit vjen pas disa vitesh punë përgatitore, ku BE, Franca dhe Shqipëria kanë bashkëpunuar për të sjellë investimin në fazën e realizimit.