Droni hyri në hapësirën ajrore të Lituanisë, u rrëzua nga avionët e NATO-s
Një incident i ri ajror ka ndodhur gjatë natës në Lituani. Një dron, i cili kishte hyrë në mënyrë të paautorizuar në hapësirën ajrore të vendit, u rrëzua nga avionë luftarakë të NATO-s.
Lajmin e bëri të ditur presidenti lituanez, Gitanas Nausėda, i cili theksoi se reagimi i aleatëve ishte i menjëhershëm. Përmes një postimi në rrjetin social X, ai konfirmoi se droni u neutralizua pak pasi u zbulua në hapësirën ajrore të Lituanisë.
Megjithatë, autoritetet lituaneze nuk kanë bërë të ditur nga cili shtet ishte nisur droni dhe as nëse ai ishte i lidhur drejtpërdrejt me ndonjë operacion ushtarak.
Nausėda e vendosi ngjarjen në kontekstin e situatës së tensionuar të sigurisë në rajon. Kjo ndodh në një kohë kur lufta e Rusisë kundër Ukrainës vijon të rrisë shqetësimet për sigurinë e vendeve në krahun lindor të NATO-s.
Presidenti lituanez theksoi se prania dhe gatishmëria e aleatëve janë thelbësore për mbrojtjen e hapësirës ajrore të vendit. Ai nënvizoi se Lituania do të vazhdojë të mbështetet te bashkëpunimi me NATO-n.
Në reagimin e tij, edhe ministri i Jashtëm i Lituanisë, Kestutis Budrys, falënderoi aleatët për mbështetjen dhe angazhimin në mbrojtjen e hapësirës ajrore. “NATO mbetet vigjilente, e angazhuar dhe e gatshme,” deklaroi Budrys, duke përcjellë mesazhin se aleanca është në gatishmëri përballë çdo kërcënimi të mundshëm në rajon.