“`html
AMF mori më pak masa ndaj subjekteve të mbikëqyrura në vitin 2025
Masat administrative dhe korrektuese të Autoritetit të Mbikëqyrjes Financiare (AMF) ndaj subjekteve të mbikëqyrura pësuan rënie vitin e kaluar. Sipas raportimit të këtij institucioni në Kuvendin e Shqipërisë, gjatë vitit 2025, Bordi i Autoritetit ka marrë 13 vendime si masa administrative e korrigjuese ndaj subjekteve të mbikëqyrura. Këto vendime janë bazuar kryesisht në gjetjet e analizave financiare, inspektimeve në vend dhe rasteve të pezullimit të licencave për ushtrimin e veprimtarisë.
Numri i masave ndaj subjekteve të mbikëqyrura ka pësuar ulje për të dytin vit radhazi. Për vitin 2024, Bordi i AMF-së pati marrë 15 masa, ndërsa për vitin 2023 raportonte 28 masa administrative dhe korrigjuese.
Në tregun e sigurimeve gjatë vitit 2025 u morën nëntë vendime:
- Tetë vendime për marrje masash dhe urdhër për eliminimin e shkeljeve ndaj shoqërive të sigurimit.
- Një vendim për heqje licence ndaj një vlerësuesi dëmesh.
Nga këto, gjashtë vendime përfshinë sanksione me gjobë në vlerën totale 7.4 milionë lekë, të cilat janë likuiduar. Vlera e gjobave të vendosura ndaj shoqërive të sigurimeve është rritur me 37% krahasuar me një vit më parë.
Sipas ligjit “Për veprimtarinë e sigurimit dhe risigurimit”, AMF mund të vendosë ndaj shoqërive të sigurimit gjoba që mund të arrijnë deri në tre milionë lekë, në varësi të shkeljes së konstatuar. Subjekte të gjobave mund të jenë edhe administratorët e shoqërive të sigurimit, për shuma nga 100 mijë deri në 400 mijë lekë, si edhe anëtarët e këshillit mbikëqyrës, në intervalin mes 300 mijë lekë dhe 500 mijë lekë.
Në raportin vjetor të vitit 2024, Kontrolli i Lartë i Shtetit (KLSH) vlerësonte se Bordi i AMF nuk kishte marrë masa ndaj shkeljeve të përsëritura të shoqërive të sigurimit, duke ndikuar në rritjen e riskut të tregut. Sipas konkluzioneve të paraqitura në raportin vjetor të vitit 2024, për periudhën e aktivitetit nga data 1 janar 2021 deri në datën 30 dhjetor 2023, ishin identifikuar mangësi në vendimmarrjen e Bordit të AMF-së, i cili nuk kishte ndërmarrë masa penalizuese ndaj shoqërive të sigurimit, pavarësisht shkeljeve të përsëritura dhe mungesës së përmirësimit të situatës financiare dhe treguesve të tyre, duke ndikuar në rritjen e riskut në sektorin e sigurimeve.
Përveç tregut të sigurimeve, vitin e kaluar Bordi i AMF-së mori një vendim në tregun e titujve, me objekt për eliminim shkeljesh, si rezultat i një inspektimi në vend. Në tregun e fondeve të pensionit vullnetar dhe sipërmarrjeve të investimeve kolektive (SIK) u morën tre vendime:
- Dy vendime për eliminim shkeljesh dhe parregullsish ndaj shoqërive depozitare.
- Një vendim për heqje licence në cilësinë e depozitarit të aseteve të një fondi pensioni vullnetar.
“`