“`html
Banka e Shqipërisë angazhohet të mbështesë financimin e ekonomisë së gjelbër
Banka e Shqipërisë, në bashkëpunim me Bankën Evropiane të Investimeve (BEI), zhvilloi së fundmi një workshop teknik dhe ndërinstitucional për hartimin e Taksonomisë së Gjelbër të Shqipërisë. Ky aktivitet, organizuar në kuadër të programit të asistencës teknike të BEI-së për gjelbërimin e sistemeve financiare, përfaqëson një hap të rëndësishëm drejt krijimit të një kuadri të qëndrueshëm për orientimin e investimeve në ekonominë shqiptare.
Taksonomia e Gjelbër ka si synim rritjen e transparencës në tregun financiar, orientimin e kapitalit drejt aktiviteteve që mbështesin zhvillimin e qëndrueshëm dhe forcimin e stabilitetit financiar në një perspektivë afatgjatë.
Workshop-i mblodhi përfaqësues nga institucionet publike, organizatat ndërkombëtare, sektori financiar, komuniteti i biznesit dhe organizatat mjedisore, me qëllim prezantimin e draftit të parë të Taksonomisë së Gjelbër. Zëvendësguvernatorja e Dytë e Bankës së Shqipërisë, zj. Natasha Ahmetaj, çeli aktivitetin duke theksuar rëndësinë e këtij dokumenti si një instrument kyç për orientimin e investimeve drejt aktiviteteve të qëndrueshme dhe për harmonizimin e standardeve të zhvillimit të ekonomisë shqiptare me ato të Bashkimit Evropian.
Ajo nënvizoi bashkëpunimin e ngushtë ndërinstitucional, me mbështetjen e Bankës Evropiane të Investimeve, në hartimin e draftit të parë, si dhe rolin e këtij procesi në formësimin e arkitekturës së informacionit të klimës, forcimin e stabilitetit financiar dhe përputhjen me objektivat kombëtarë për klimën dhe mjedisin.
Zëvendësguvernatorja shtoi se workshop-i shërbeu si platformë konsultimi për draftin e parë të Taksonomisë së Gjelbër, duke mundësuar mbledhjen e komenteve teknike nga të gjitha palët e interesuara, me qëllim përmirësimin dhe zbatueshmërinë e saj në praktikë.
Banka e Shqipërisë mbetet e angazhuar për të mbështetur financimet e gjelbra në ekonominë e vendit, në përputhje me Marrëveshjen e Parisit dhe objektivin e stabilitetit financiar. Finalizimi me sukses i këtij projekti përmbush gjithashtu një nga kërkesat e procesit të integrimit të Shqipërisë në BE.
Aktiviteti u zhvillua në dy sesione në formën e një tryeze të rrumbullakët:
- Sesioni i parë: Pjesëmarrës ishin zyrtarë të lartë dhe grupe teknike ndërinstitucionale nga Ministria e Financave, Ministria e Ekonomisë dhe Inovacionit, Ministria e Mjedisit, Ministria e Bujqësisë dhe Zhvillimit Rural, Ministria e Infrastrukturës dhe Energjisë, Grupi i Punës i Bankës së Shqipërisë dhe AMF, si pjesë e grupit ndër-institucional për Taksonominë e Gjelbër.
- Sesioni i dytë: Morën pjesë përfaqësues të sektorit bankar, profesionistë, korporata të mëdha, organizata mjedisore dhe dhoma të tregtisë, me qëllim marrjen e komenteve konsultative për finalizimin e dokumentit.
Gjatë sesioneve u prezantuan konceptet kryesore të taksonomisë, kriteret teknike të klasifikimit të aktiviteteve ekonomike, si dhe nevojat për përshtatjen e tyre në kontekstin shqiptar dhe përafrimin me standardet e Bashkimit Evropian.
Në përfundim të procesit konsultimi, synohet finalizimi i dokumentit dhe formalizimi i bashkëpunimit ndërinstitucional përmes një Memorandumi Mirëkuptimi, i cili do të shërbejë si bazë për zbatimin e mëtejshëm të taksonomisë në Shqipëri.
“`