Berisha: Policia ushtroi terror dhe sjellje barbare ndaj opozitës
Kreu i Partisë Demokratike, Sali Berisha, mbajti një fjalë në fund të protestës së opozitës, zhvilluar para selisë së kësaj partie. Berisha akuzoi policinë për dhunë barbare dhe të paprecedentë ndaj protestuesve dhe zyrtarëve të lartë të PD-së.
“Një mirënjohje të pakufishme dhe përshëndetjet më të përzemërta për ju, për qëndresën, për heroizmin, qëndruat të pamposhtur ndaj një terrori të një regjimi që u soll sonte si një pushtues barbar,” deklaroi Berisha. Sipas tij, “zëri juaj, qëndresa juaj, u shndërrua në tmerr të vërtetë për narko-regjimin e Edi Ramës.”
Ai shtoi se sot, me urdhër të Edi Ramës, Skënder Ballukut, Sokol Bizhgës dhe Enton Allushit (shef i policisë operative), zyrtarët policorë kanë treguar “fytyrat e vërteta prej kriminelësh profesionistë”. “Nuk kanë asgjë të përbashkët me punonjësit e policisë, por janë kriminelë të certifikuar, të cilët mendojnë se do zmbrapsin një popull të tërë në mbrojtje të dyshes famëzezë Rama dhe Balluku.”
Berisha vijoi duke deklaruar se “Dosja Rama-Balluku nuk mbyllet gjer ditën e fundit të jetës së tyre. Ata janë të regjistruar në analet e këtij populli, hajdutët më të mëdhenj të historisë së shqiptarëve. Ndaj dhe nuk ka forcë në botë që t’i mbrojë ata nga ndëshkimi mbarëpopullor.”
Ai denoncoi faktin se sot, në emër të Lubi Ballukut dhe Edi Ramës, Skënder Balluku, duke marrë drejtimin e “narko-policisë”, “shënjestroi dhe goditi drejtuesit kryesorë të Partisë Demokratike”. Sipas tij:
- Luciano Boçi është në spital me djegie.
- Flamur Noka përsëri pësoi goditje, por vazhdon detyrën.
- Klevis Balliu është në spital.
- Në spital janë edhe drejtues të tjerë.
- Aulon Kalaja, gazetarja Aulon Kalaja, u godit personalisht, si hakmarrje për qëndrimin e tij ndaj regjimit.
- Drejues dhe veprimtarë të tjerë të Partisë Demokratike janë plagosur.
Berisha akuzoi gjithashtu se Sokol Balluku ka përdorur “bombat kundër protestuesve, granatat e zhurmës që quhen dhe që kanë plagosur disa prej tyre”. Ai shtoi se policia ka hedhur “shishe molotov dhe kanë plagosur edhe protestues, por dhe policë, sepse u duheshin si dëshmitarë të gjoja akteve të protestuesve.”
“Dënoj me forcën më të madhe dhe ju siguroj se forcë në botë që të mposhtë kryengritjen tonë paqësore nuk ka,” tha Berisha, duke përfunduar me shprehjen e nderimit dhe mirënjohjes së tij për pjesëmarrësit. Ai gjithashtu lajmëroi se protesta e radhës do të mbahet shumë shpejt.