ERRU Nis Rishikimin e Metodologjisë së Tarifave të Ujit, Afati i Aplikimeve Shtyhet në Nëntor
Enti Rregullator i Ujit (ERRU) ka filluar procedurën për rishikimin e metodologjisë dhe procedurës së miratimit të tarifave të shërbimeve ujësjellës-kanalizime. Synimi kryesor i këtij rishikimi është ndryshimi i afateve të aplikimit, rregullimi i periudhave tranzitore dhe krijimi i bazës për mekanizma të rinj tariforë.
Vendimi nr. 22, miratuar më 20 korrik 2026 nga Komisioni Kombëtar Rregullator, parashikon që procesi i rishikimit të përfundojë deri më 15 shtator 2026. Për aplikimet e vitit 2026, afati për dorëzimin e dokumentacionit të nevojshëm për nivele të reja tarifore është shtyrë deri më 30 nëntor.
Sipas metodologjisë aktuale, shoqëritë ujësjellës-kanalizime duhet të paraqisnin dokumentacionin e plotë deri më 30 qershor. Enti ka konstatuar se aplikimet e depozituara gjatë vitit 2026 rezultuan me mangësi në dokumentacion, ndërkohë që shoqëritë rajonale kishin kërkuar zgjatjen e afatit.
Ndryshimet e propozuara përfshijnë vendosjen e datës 30 nëntor si afat përfundimtar për aplikimet tarifore dhe parashikimin e një periudhe tranzitore për operatorët, periudha rregullatore e të cilëve përfundon para hyrjes në fuqi të vendimit të ri. Gjatë kësaj periudhe, tarifat dhe kushtet ekzistuese do të mbeten në fuqi, për një afat jo më të gjatë se një vit.
Metodologjia e rishikuar pritet të adresojë gjithashtu situatat kur një shoqëri nuk kërkon ndryshim tarife pas përfundimit të periudhës rregullatore. Në raste të tilla, operatori duhet t’i paraqesë Entit një analizë tekniko-ekonomike, të miratuar nga organet drejtuese të shoqërisë.
Shoqëritë që mbulojnë kostot e operimit dhe mirëmbajtjes deri në 100% mund të vazhdojnë me të njëjtin plan tarifor për një periudhë maksimale prej dy vitesh. Për operatorët me mbulim të kostove mbi 100%, parashikohet vijimi me të njëjtin nivel tarifor për një vit. Vendimmarrja për afatin përfundimtar do t’i takojë Komisionit Kombëtar Rregullator.
Një element tjetër i rishikimit është krijimi i bazës rregullatore për tarifa me fasha ose blloqe konsumi, në rastet kur këto justifikohen nga kushte të veçanta operative dhe synojnë garantimin e furnizimit të qëndrueshëm dhe ruajtjen e burimeve ujore. Propozimi për këtë mekanizëm erdhi pas një kërkese të Agjencisë Kombëtare Ujësjellës Kanalizime për aplikimin e tarifimit sezonal me fasha konsumi në Durrës, Vlorë dhe Sarandë, zona këto që përballen me ngarkesë të lartë turistike gjatë sezonit.
Sipas vendimit, ndryshimet synojnë të përmirësojnë procesin e aplikimit, cilësinë e dokumentacionit dhe zbatueshmërinë e procedurave tarifore. Vendimi ka hyrë në fuqi menjëherë dhe Drejtoria Tekniko-Ekonomike është ngarkuar me zbatimin e tij.