Gjykata Evropiane e të Drejtave të Njeriut i jep ultimatum Turqisë: Lironi menjëherë Osman Kavalën!
Gjykata Evropiane e të Drejtave të Njeriut (GJEDNJ) ka urdhëruar Turqinë të lirojë sa më shpejt të jetë e mundur biznesmenin dhe aktivistin Osman Kavala. Gjykata e ka cilësuar të pavlefshëm dënimin e tij me burgim të përjetshëm.
GJEDNJ vendosi gjithashtu që Turqia t’i paguajë Kavalës një dëmshpërblim prej më shumë se 110 mijë euro.
Osman Kavala, i cili është bërë simbol i goditjes ndaj shoqërisë civile në Turqi, u arrestua në tetor 2017 dhe që atëherë ndodhet në burg në Stamboll. Fillimisht, ai u akuzua për rolin e pretenduar në protestat e Parkut Gezi të vitit 2013, të cilat ishin kundër qeverisë së Recep Tayyip Erdoganit.
Megjithëse Gjykata e Strasburgut kishte kërkuar më parë lirimin e tij dhe ai ishte liruar nga akuzat në vitin 2020, Kavala u arrestua sërish menjëherë me akuza të tjera. Në vitin 2022, ai u dënua me burgim të përjetshëm për tentativë për përmbysjen e qeverisë.
Në vendimin e saj, të miratuar me 15 vota pro dhe 2 kundër, GJEDNJ vlerësoi se ndjekja penale, paraburgimi dhe dënimi i Kavalës ishin motivuar kryesisht nga qëllimi për ta ndëshkuar për rolin e tij në protestat e Parkut Gezi dhe për aktivitetin e tij si mbrojtës i të drejtave të njeriut. Sipas Gjykatës, këto veprime synonin gjithashtu ta heshtnin Kavalën.
Turqia është dënuar më herët nga Gjykata e Strasburgut për shkelje të:
- Lirisë së shprehjes
- Lirisë së tubimit
- Të drejtës për liri dhe siguri
- Të drejtës për një proces të drejtë
- Si dhe për trajtim çnjerëzor dhe degradues
GJEDNJ theksoi gjithashtu se refuzimi i autoriteteve turke për ta liruar Kavalën, pavarësisht vendimeve të mëparshme të Gjykatës, minon besimin e qytetarëve dhe shoqërisë te sundimi i ligjit dhe cenon rendin kushtetues.
Vendimi i fundit e vendos sërish Ankarën përballë detyrimit për të zbatuar vendimet e Gjykatës Evropiane për të Drejtat e Njeriut.