“`html
Një 16-vjeçar plagos rëndë dy vajza në një shkollë në Bavari; zbardhen detajet e para
Të paktën dy vajza janë plagosur rëndë dhe një person i dyshuar 16-vjeçar është arrestuar pas një sulmi në një shkollë të mesme në shtetin jugor gjerman të Bavarisë të mërkurën.
Autori duket se e ka synuar qëllimisht shkollën e mesme Welfen në qytetin Schongau, në atë që dyshohet të jetë një “agravim” i situatës, tha një zëdhënës i policisë për agjencinë e lajmeve AFP. Ai nuk ishte në gjendje të konfirmonte raportet që pretendonin se sulmuesi përdori një thikë.
Policia lokale njoftoi në llogarinë e tyre në X se “një autor i dyshuar është arrestuar”, duke shtuar më vonë se bëhet fjalë për një “djalë 16-vjeçar”.
Fillimisht policia kishte folur për “disa” të plagosur dhe më vonë të mërkurën pasdite njoftoi se “sipas informacionit aktual, dy vajza janë plagosur rëndë”. Ata shtuan se “jeta e vajzave nuk është në rrezik” dhe nuk specifikuan nëse ato ishin nxënëse në shkollë.
Policia deklaroi se “aktualisht po supozon se autori i krimit ka vepruar i vetëm”.
Policia u kërkoi njerëzve të shmangin zonën pas incidentit në Schongau, një qytet me rreth 12,000 banorë në veri të Alpeve. “Një operacion i madh policor është duke u zhvilluar. Ne jemi në vendngjarje me forca të shumta.”
Një pikë kontakti është ngritur për prindërit dhe të afërmit e nxënësve të shkollës në stacionin e zjarrfikësve të Schongau-t.
E përditshmja Bild raportoi se policia kishte vënë në lëvizje gjashtë helikopterë, përfshirë një për të trajtuar të plagosurit. Një nga helikopterët u përdor gjithashtu në kërkimin e të dyshuarit, i cili ishte për pak kohë në arrati para se të gjendej dhe të kaptej nga policia.
Dhuna serioze në shkolla dhe institucione të tjera arsimore është e rrallë, por jo e panjohur në Gjermani. Vitin e kaluar, një mësues 45-vjeçar u plagos rëndë në një kolegj profesional në qytetin perëndimor të Essenit. I dyshuari kryesor, një 17-vjeçar nga Kosova, u qëllua nga policia para arrestimit të tij. Prokurorët e akuzuan atë për veprim të shtyrë nga motive “xhihadiste”. Në janar të vitit 2022, një 18-vjeçar gjerman qëlloi për vdekje një student në një sallë leksionesh në Universitetin e Heidelbergut dhe plagosi tre studentë të tjerë, përpara se ta drejtonte armën nga vetja.
“`