Musk lavdëron Xi Jinping: Është një lider i madh, Kina ka përjetuar prosperitet të jashtëzakonshëm
Drejtori ekzekutiv i Tesla-s, Elon Musk, ka vlerësuar publikisht presidentin kinez Xi Jinping, duke e cilësuar atë si një “lider të madh” gjatë një interviste për transmetuesin shtetëror kinez CCTV.
Duke folur për zhvillimin e Kinës gjatë drejtimit të Xi, Musk tha se vendi ka përjetuar një rritje të jashtëzakonshme të prosperitetit. Ai përmendi investimet në ndërtesa dhe infrastrukturë, ndërsa theksoi se edhe standardi ekonomik i qytetarëve të zakonshëm kinezë është përmirësuar.
“Është e qartë, vetëm duke ecur nëpër rrugë, se prosperiteti i qytetarit mesatar kinez është rritur”, u shpreh Musk.
Gjatë intervistës, biznesmeni amerikan foli edhe për aktivitetin e Tesla-s në Kinë, duke veçuar fabrikën e kompanisë në Shangai. Ai e përshkroi impiantin si një “perlë” dhe vlerësoi ekipin që punon atje, duke e cilësuar si jashtëzakonisht të talentuar, punëtor dhe të besueshëm.
Deklaratat e Musk vijnë në një moment kur pritet takimi i presidentit amerikan Donald Trump me Xi Jinping. Musk pritet gjithashtu të marrë pjesë në një darkë në Shtëpinë e Bardhë me drejtues të tjerë të biznesit amerikan, të organizuar në nder të presidentit kinez. Trump dhe Xi pritet të zhvillojnë takimin e tyre të dytë gjatë këtij viti, pas vizitës së presidentit amerikan në Kinë.